एकीकृत समाजवादीको केन्द्रीय परिषद् बैठक बस्दैछ । पार्टी गठनपछि केन्द्रीय परिषद् बैठक पहिलोपटक बस्न लागेको हो ।

मन्त्री फेरबदलको निर्णयपछि केही दिनदेखि आन्तरिक विवाद चुलिएको कारण समाजवादीको परिषद् बैठकलाई चासोका साथ हेरिएको छ । बैठकमा देशभरबाट करिब एक हजार पाँच सय नेता कार्यकर्ता सहभागी हुनेछन् । प्रधानमन्त्री शेरबहादुर देउवाले समाजवादीको सचिवालय निर्णयअनुसार मन्त्रिपरिषद् फेरबदल गरे पनि नवनियुक्त मन्त्रीमाथि आइतबारै बाहिरिएका मन्त्रीको ठूलै असन्तोष देखिएको छ ।

यसबाहेक बैठकमा पार्टीको देशभरका साङ्गठनिक गतिविधि, स्थानीय तह चुनावको समीक्षा तथा हालै सम्पन्न केन्द्रीय कमिटीको बैठकमा प्रस्तुत भएका केही प्रतिवेदनमाथि छलफल हुँदैछ । बैठकले प्रतिनिधिसभा र प्रदेश सभाको आसन्न चुनावलक्षित कार्यक्रममा छलफल गर्ने प्रचार विभाग उपप्रमुख शम्भु श्रेष्ठले जानकारी दिए ।