भक्तपुर, १४ असार २०७९भक्तपुर नगरपालिका वडा नम्बर १ स्थित विद्यालयका शिक्षकलाई फोहोर ब्यवस्थापन र कौसी खेतीबारे प्रशिक्षण दिइएको छ । उनीहरूलाई नगरपालिकाले २ दिने प्रशिक्षण दिएको हो ।
प्रशिक्षण कार्यक्रमलाई सम्बोधन गर्दै वडाध्यक्ष श्याम कृष्ण खत्रीले घरको ७५ प्रतिसत फोहोरलाई कौसी खेतीमा प्रयोग गर्न सकिने बताए । नगरपालिकाले फोहोर ब्यवस्थापनमा ठुलो बजेट खर्च गरिरहनुपरेको उल्लेख गर्दै वडाध्यक्ष खत्रीले प्रशिक्षणबाट कौसी खेती संगै फोहोर ब्यवस्थापनमा समेत सहयोग मिल्ने बिश्वास ब्यक्त गरे । कौसी खेतीमा घरकै फोहोर प्रयोग गर्न सकिने र स्वास्थ्यकर बाताबरण र खानेकुरा प्राप्त हुने भएकोले यसलाई महत्वका साथ अघि बढाइएको उनले बताए ।
दुधपाटीस्थित वडा कार्यालयको हलमा सोमबार देखि प्रशिक्षण शुरु भएको हो । प्रशिक्षणमा वडाका सामुदायिक र सस्थागत विद्यालयका गरी २६ बढी शिक्षक सहभागी भएका वडाध्यक्ष श्यामकृष्ण खत्रीले जनाएका छन् । सहभागीहरुले प्रशिक्षणबाट धेरै ज्ञान प्राप्त भएको भन्दै बुझ्नेले फोहोरलाई मोहर बनाउन सक्नेबारे बताए । घरका काम ललाग्ने बस्तुलाई कौसी र करेसामा गमला र थाङ्ग्रा बनाउन सकिने र घरमै कुहिले बस्तुबाट प्राङारिक मल बनाउन सकिने ज्ञान प्राप्त भएको उनीहरुको भनाइ छ । उनीहरुले सिकेका कुरा ब्यवहारमा उतार्ने प्रतिवद्धता प्रकट गर्दै आफूले पाएको ज्ञान समूहमा बाढ्ने समेत बताएका छन् ।