सूर्यविनायक, १५ असार २०७९भक्तपुरको सूर्यविनायक नगरपालिकाका प्रमुख बासुदेव थापाले अब उप्रान्त कुनै पनि निर्वाचनमा उम्मेद्वारी नदिने घोषणा गरेका छन् । दोश्रो कार्यकालका लागि निर्वाचित गरेकोमा मतदातालाई धन्यवाद भन्दै उनले उक्त घोषणा गरेका हुन् ।
बुधवार निवर्तमान बनेका सूर्यविनायकका जनप्रतिनिधिको बिदाई कार्यक्रमलाई सम्बोधन गर्दै नगर प्रमुख थापाले अब आफूले साझा भूमिका निभाउने जिकिर गरे । पार्टीसंग पनि आफ्नो अब कुनै पनि तहको निर्वाचनका लागि टिकटको दावी नरहने खुलासा गर्दै प्रमुख थापाले वर्तमान कार्यकाललाई पूर्ण सफल बनाउने तर्फ प्रतिवद्ध रहने प्रष्ट पारे ।
अघिल्लो कार्यकालमा चारपाँच जना कर्मचारी लिएर काम शुरु गरेको स्मरण गर्दै उनले वर्तमान अवस्था सम्म आइपुग्दा सन्तोषजनक काम भएको दावी गरे । अघिल्लो कार्यकालमा ७६ वटा कानुन बनाएको उल्लेख गर्दै प्रमुख थापाले विद्यालय र अस्पताल समेत बनाइएको बताए । भौतिक पूर्वाधारमा नगरपालिकाले उल्लेख्य प्रगति गरेको प्रष्ट पार्दै उनले विकासनिर्माण हेर्न सूर्यविनायक जानुपर्छ भन्ने उदाहरण प्रस्तुत गर्न समेत सफल भएको दावी गरे ।
नवनिर्वाचित जनप्रतिनिधि दलगत स्वार्थ भन्दा माथि उठेर साझा चरित्र निभाउनुपर्ने र जनताको सच्चा प्रतिनिधि बन्नुपर्ने बताउदै उनले अघिल्लो कार्यकालमा सहयोग गरी वर्तमानमा निवर्तमान बनेका जनप्रतिनिधिको नगरपालिकाले उच्च मूल्यांकन गरेको समेत उल्लेख गरेका थिए ।
कार्यक्रममा नगर प्रमुख थापाले आफ्नो बलबुताले भ्याएसम्म नगरपालिकालाई सम्बृद्ध र देशकै उत्कृष्ट नगरपालिका बनाउन प्रयास गर्ने प्रतिवद्धता प्रकट गरेका छन् । 
पूर्वमन्त्री एवं सांसद महेश बस्नेतको प्रमुख आतिथ्यतामा सम्पन्न कार्यक्रममा जिसस प्रमुख ईश्वरबहादुर थापा, सूर्यविनायक उपप्रमुख सरिता तिम्सिना भट्टराई लगायतको उपस्थिति रहेको थियो ।