भक्तपुर, २४ असार २०७९प्रमुख तीन दलका शीर्ष नेताहरुको प्रधानमन्त्रीको निवास बालुवाटारमा छलफल भएको छ । आज बिहान प्रधानमन्त्रीसँगको छलफलका लागि माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधव नेपाल बालुवाटार पुगेका थिए ।
भेटमा नागरिकता विधेयकका विषयमा केन्द्रीत रहेर छलफल भएको बालुवाटार स्रोतले बताएको छ । सरकारले चार वर्ष अगाडी संसदमा लगेको नागरिकता विधेयक आजै संसदबाट फिर्ता लिँदैछ । स्रोतका अनुसार कांग्रेस सभापति समेत रहेका प्रधानमन्त्री शेरबहादुर देउवा जन्मका आधारमा नेपाली नागरिकता पाएका नागरिकको सन्तानलाई बंशजको नागरिकता दिने प्रावधान मात्र ल्याउने गरी नयाँ विधेयक ल्याउन चाहन्छन् । नागरिकताका बारेमा छलफल सकिएपछि गृहसचिव बाहिरिएको र त्यसपछि भने तीन शीर्ष नेताहरुले निर्वाचन आयोगले विहिबार प्रधानमन्त्रीलाई मंसिर २ मा निर्वाचन गराउन मिति सिफारिस गरेको विषयमा पनि छलफल भएको बालुवाटार स्रोतले जनाएको छ ।
सरकार अब यसै महिनाको अन्तिमसम्म संघ र प्रदेशको आगामी निर्वाचनको मिति तोक्ने गरी तयारीमा जुटेको छ । यसै विषयमा प्रधानमन्त्रीले सत्तासहयात्री दल माओवादी केन्द्रका अध्यक्ष प्रचण्ड र नेकपा एकीकृत समाजवादीका अध्यक्ष माधव नेपालसाग छलफल गरेका हुन् । छलफलका क्रममा गठबन्धन दलहरुले आउने चुनावमा के कसरी तालमेल गर्ने भन्ने विषयमा पनि प्रारम्भिक छलफल भएको बताइएको छ ।