भक्तपुर,११ साउन २०७९फिलिपिन्समा आज गएको भूकम्पमा ४ जनाको मृत्यु भएको छ भने ६० जनाभन्दा बढी घाइते भएका छन्। त्यहाँको लुजोन टापुमा आज ७ दशमलव १ म्याग्निच्युडको शक्तिशाली भूकम्प गएको थियो।
भूकम्पले उत्तरी प्रान्तमा रहेका अस्पताल र भवनहरूमा क्षति पुर्याएको सरकारी अधिकारीहरूले बताएका छन्। भूकम्पको धक्का राजधानी मनिलामा समेत महसुस गरिएको थियो। उद्धारका लागि ठूलो सङ्ख्यामा सुरक्षाकर्मी तथा उद्धारकर्ता परिचालन गरिएको अन्तरराष्ट्रिय सञ्चारमाध्यम एएनआईले जनाएको छ। राष्ट्रपति फर्निनान्ड मार्कोस जुनियरले भूकम्पबाट प्रभावित क्षेत्रमा खोजी तथा उद्धारका लागि कुनै कसर बाँकी नराख्न निर्देशन दिएका छन्।
बेंगु प्रान्तमा २ जनाको मृत्यु भएको छ भने अब्रामा एकजना र अर्को प्रान्तमा पनि एकजनाको मृत्यु भएको गृहसचिव बेन्जामिन अबालोसले बताए।भूकम्पको केन्द्रविन्दु डोलोरेस शहरबाट करिब ११ किलोमिटर दक्षिणपूर्वमा सतहको करिब १० किलोमिटर मुनि रहेको अमेरिकी भौगर्भिक सर्भेले जनाएको बेलायती समाचार एजेन्सी रोयटर्सले उल्लेख गरेको छ।