भक्तपुरपोष्ट संवाददाता भक्तपुर,१८ साउन २०७९
भक्तपुर,१८ साउन २०७९रुपन्देहीमा वैवाहिक बलात्कारविरुद्धको मुद्दा दर्ता भएको छ । तिलोत्तमा नगरपालिकामा एक महिलाले आफ्नै पतिविरुद्ध लामो समयदेखि जबर्जस्ती करणी गरेको भन्दै वैवाहिक बलात्कारको मुद्दा दर्ता गराएकी हुन् ।
तिलोत्तमा नगरपालिका १७ निवासी उक्त पुरुषविरुद्ध इलाका प्रहरी कार्यालय, बुटवलमा पुगेर पीडित महिलाले गत मंगलबार आफ्नै पतिले बलात्कार गरेको भन्दै किटानी जाहेरी दिएकी हुन् ।
डीएसपी ठगबहादुर केसीका अनुसार चौधरी थरकी महिलाले ६ महिनादेखि मादक पदार्थ तथा लागूपदार्थ खाएर कुटपिट गर्नाका साथै आफू बिरामी हुँदा पनि इच्छाविपरीत जबर्जस्ती करणी गरेको भन्दै आरोप लगाएकी छन् ।
उजुरीलगत्तै घटनाबारेमा अनुसन्धान जारी राखिएको प्रहरीको भनाइ छ । आफ्नै पत्नीलाई इच्छाविपरीत जबर्जस्ती करणी गरे पाँच वर्षसम्म जेल सजाय हुने कानुनी व्यवस्था पनि रहेको छ