मंगलबार (हिजो) राती परेको अविरल बर्षाको कारण भक्तपुरका विभिन्न स्थानहरुमा मनोहरा खोला पसेपछि करिब १ सय  घर टहराहरुमा क्षति पुगेको छ । प्रभावित स्थानमा नेपाल प्रहरी र स्थानीयको सहयोगमा उद्दार कार्य गरिएको भक्तपुरका प्रहरी नायब उपरीक्षेक राजु पाण्डेले जानकारी दिए ।

भक्तपुर चाँगुनारायण नगरपालिका वडा नं ४ मनहरा खोला निलोपुल नजिक जिल्ला सुनसरी घर भई हाल स्थानमा बंगुर फर्म संचालन गर्ने हरी राईको बंगुर फर्मबाट खोलाले ४ वटा बंगुर बगाएको छ । चांगुनारायण नगरपालिका वडा नं १ दुवाकोट बेसी मनहरा खोला किनारका २० वटा घर टहरामा पानी पसी १ वटा टहराको ४ जना मानिसको उद्धार गरिएको पाण्डेले बताए ।

मध्यपुर ठिमी नगरपालिका वडा नं २ मनहरा खोला किनारको बंगुर फर्ममा रहेका ५०० वटा हाँस , २०० वटा बंगुर र २ वटा गाई उद्धार गरि सुरक्षित स्थानमा सारिएको छ । मध्यपुर ठिमी नगरपालिका वडा नं १ मनहरा खोला किनारमा रहेको सुकुम्वासी बस्तीमा खोलाले कटान गरी माटोको ढिस्को खोलामा खस्दा खोलाको धार परिवर्तन भई ६० वटा घर टहरामा पानी पसेको छ ।

मध्यपुर ठिमी नगरपालिका वडा नं२ सानोठिमी मनहरा खोला किनारमा टहरा भित्र रहेको २६ बोरा चामलमा पानी पसी क्षती भएको र गिरीराज कुखुराको चल्ला ४५ वटा बगाएको पाण्डेले बताए ।