भक्तपुर, २६ साउन २०७९चाँगुनारायण नगरपालिकाका मेयर जीवन खत्रीले राम्रो स्वास्थ्यका लागि शारीरिक सुगठन आवश्यक रहेको बताएका छन् । युवा आकर्षणको दृष्टिले मात्र नभई स्वास्थ्यको दृष्टिकोणले पनि शारीरिक सुगठन महत्वपूर्ण रहेको उनले बताएका हुन् । जिल्ला शारीरिक सुगठन भक्तपुरका अध्यक्ष बाबुकाजी मानन्धरको नेतृत्वमा चाँगुनारायण पुगेको शारीरिक सुगठन संघको कार्यसमितिलाई सम्बोधन गर्दै उनले सोकुरा बताएका सल्लाहकार रामकृष्ण मानन्धरले जानकारी गराए । निर्वाचित नगर प्रमुख जीवन खत्री र उपप्रमुख रमेश बुढाथोकीलाई सम्मान पत्र प्रदान गर्न बुधवार जिल्ला शारीरिक सुगठन संघ भक्तपुरको टोली चाँगुनारायण पुगेको थियो । उक्त अवसरमा अध्यक्ष बाबुकाजी मानन्धरले शारीरिक सुगठनको क्षेत्रमा रहेका समस्याहरु अवगत गराउदै त्यसको समाधानका लागि नगरपालिकाको सहयोग रहने बिश्वास ब्यक्त गरेका थिए । उनले आफूहरुले जिल्लामा आयोजना गर्न लागेको पाँचौ मिस्टर भक्तपुर र दोश्रो महिला फिजिक्स प्रतियोगिताको लागि समेत चाँगुनारायण नगरपालिकाले सहयोग गर्ने अपेक्षा प्रकट गरे । प्रतियोगिता भदौ १७ र १८ गते गर्ने तयारी रहेको बताइएको छ । मेयर खत्री र उपमेयर बुढाथोकीले उक्त प्रतियोगितामा आफूहरुको सहयोग रहने आश्वासन समेत दिएका छन् । उक्त अवसरमा सल्लाहकार अधिवक्ता रामकृष्ण मानन्धर, कोषाध्यक्ष एवं प्रतियोगिता संयोजक अशोक घजु, सदस्यहरु रोशन मानन्धर र रमेश सुवाल लगायतको उपस्थिति रहेको थियो ।