सांसद लीलादेवी सिटौलाले राष्ट्रपति विद्यादेवी भण्डारीका विषयमा संसद्मा गम्भीर प्रश्न उठाएकी छन् । आइतबार प्रतिनिधिसभा बैठकमा जनता समाजवादी पार्टी (जसपा)की सांसद सिटौलाले राष्ट्रपतिले कानुन प्रमाणीकरण गर्दा समेत कुन पार्टीको सरकारले पठाएको भनेर व्यवहार गर्ने गरेको भन्दै यसले उक्त पदमाथि नै गम्भीर प्रश्न उठाएको बताइन् ।

उनले केपी शर्मा ओली नेतृत्वको सरकारले संसद्मा नागरिकता विधेयक ल्याए पनि तीन वर्षसम्म रोकेर राखेको भन्दै प्रधानमन्त्रीको कुर्सी हल्लिएपछि अध्यादेश जारी गरेको बताइन् । त्यस्तो बेला ओलीलाई सहयोग गर्न उही दिन अध्यादेशमा लालमोहर लगाइएको भन्दै उनले अहिले त्यही अध्यादेश विधेयकका रूपमा पारित गरेर पठाउँदा राष्ट्रपति भण्डारीले दलीय राजनीति गरेको आरोप लगाइन् ।

उनले त्यही अध्यादेश विधेयकका रूपमा संसद्बाट पारित गरेर पठाउँदा राष्ट्रपतिले दलीय राजनीति गरिरहेको जिकिर गरिन् । तीन वर्ष काम नगरेको भन्दै ओली र नेकपा एमालेलाई ऐनका विषयमा विमति राख्ने नैतिकता समेत नभएको उनले बताइन् ।