भक्तपुर, २९ साउन २०७९उपराष्ट्रपति नन्दबहादुर पुनको प्रमुख आतिथ्यतामा काठमाडौस्थित पाकिस्तानी राजदुतावासले आफ्नो देश पाकिस्तानको ७५ औँ स्वतन्त्रता दिवस मनाएको छ । आइतबार साँझ पाकिस्तानी राजदुतावास र नेपाल–पाकिस्तान मैत्री तथा सांस्कृतिक सङ्घले संयुक्त रूपमा एक विशेष कार्यक्रमका बीच स्वतन्त्रता दिवस मनाएको हो ।
कार्यक्रममा श्रम, रोजगार तथा सामाजिक सुरक्षा मन्त्री शेरबहादुर कुँवरले नेपाल र पाकिस्तानबीचको पारस्परिक सहयोग, एकता र मैत्री उदाहरणीय रहेको भन्दै त्यसको निरन्तरतामा जोड दिएका थिए । त्यसैगरी पाकिस्तानका राजदुत सइद हैदर शाहले पाकिस्तान र नेपालबीचको सम्बन्धलाई थप मजबुद बनाउन आफू लागिरहेको बताए । उनले दक्षिण एसियाको समृद्धिका लागि शान्तिको आवश्यकता रहेको र त्यो सदस्य हुनुको नाताले नेपाल-पाकिस्तान दुबै देशको साझा चासोको विषय भएको समेत भनेका थिए ।
हिमालय शमशेर जबराको सभापतित्वमा सम्पन्न कार्यक्रममा विभिन्न राष्ट्रका राजदुत, कुटनैतिक नियोगका प्रतिनिधि, पूर्व मन्त्री तथा नेता, अभिनेता, उद्योगीब्यापारी र पत्रकार लगायत बौद्धिक वर्ग एवं पाकिस्तानलाई मन पराउने मानिसहरुको प्रतिनिधिमूलक सहभागिता रहेको थियो । यस अघि पाकिस्तान दूतावासमा राष्टिय झण्डा झण्डोत्तोलन गरिनुका साथै पाकिस्तानका राष्ट्रपति र प्रधानमन्त्रीको शुभकामना सन्देश पढेर सुनाइएको थियो ।