भक्तपुर, ५ भदौ २०७९भक्तपुरको कटुन्जे घर भई लामो समय देखि अस्ट्रेलियाको मेलवर्नमा बसोबास गर्दै आएका संचारकर्मी एवं साहित्यकार सुशील चालिसे र उनकी पत्नी अनिता भण्डारी चालिसेले सामाजिक सेवामार्फत आफ्ना दुई छोरीहरुको जन्मोत्सव मनाएका छन् ।
लक्ष्मी प्रतिष्ठानद्वारा अति सिमान्तकृत बालबालिकाहरुलाई शिक्षामा पहुँच गराउने उद्देश्यले निःशुल्क संचालन गर्दै आएको कुमार बलराम स्मृति छात्रावासलाई आर्थिक सहयोग गरेका छन् । ८ वर्षिया छोरी शायना चालिसे र ५ वर्षिया छोरी समिका चालिसेको एकैदिन परेको जन्मदिनको अवसर पारेर उनीहरुले छात्रावासलाई ५० हजार रुपैयाँ आर्थिक सहयोग गरेका हुन् ।
भाद्र २ गते बिहिबार हजुरबुबा सूर्यप्रसाद चालिसे र हजुरआमा अम्बिका चालिसेमार्फत छात्रावासलाई आर्थिक सहयोग प्राप्त भएको उक्त छात्रावासका संचालक समाजसेवी बिष्णु गौतमले जनाएका छन । मानवीय सेवालाई महत्व दिएर गरिएको सहयोगले समाजलाई सकारात्मक उर्जा दिने छात्रावास संचालकले बिश्वास व्यक्त गरेका छन् । लक्ष्मी प्रतिष्ठानद्वारा अति सिमान्तकृत बालबालिकाहरुलाई शिक्षामा पहुँच गराउने उद्देश्यले निःशुल्क संचालन गर्दै आएको कुमार बलराम स्मृति छात्रावासमा आश्रित करिब दुई सय बालबालिकाहरुले सेवा पाइरहेको बताइएको छ ।
चालिसे दम्पतीले आफ्ना छोरीहरुको प्रत्येक जन्मोत्सवमा कुनै न कुनै सामाजिक संस्थालाई आर्थिक सहयोग प्रदान गर्दै आएका छन् । गत साल उनीहरुले चाँगुनारायण नगरपालिकाको झौखेलस्थित मानव सेवा समाजद्वारा संचालित सेवा घर लाइ २५ हजार सहयोग गरेका थिए । अघिल्लो वर्ष कलाकारद्वय सिताराम कट्टेल(धुर्मुस) र कुन्जना घिमिरे(सुन्तली)द्वारा संचालित सामाजिक सस्था धुर्मुस सुन्तली फाउन्डेसनको गौतम बुद्ध अन्तर्राष्ट्रिय क्रिकेट रङ्गशाला निर्माणका लागि ४३ हजार ३ सय ५७ रुपैयाँ सहयोग प्रदान गरेका थिए ।
चालिसे दम्पतीले त्यस अघि राधा पौडेल आबद्ध संस्था एक्सन वर्क नेपाल,दिक्षा चापागाईं आबद्ध पबित्र समाज नेपाल, नायिका स्वेता खड्काले सन्चालन गरेको स्वेता श्री फाउण्डेशन र गौतम लामिछाने एवं पद्मा पाण्डेद्वारा सन्चालित सामाजिक संस्था विरुवा नेपाललाई आर्थिक सहयोग गरी सामाजिक सेवामा जोडिएका थिए।
