भक्तपुर, १२ भदौ २०७९बजार अनुगमनलाई तीब्रता दिएको जिल्ला प्रशासन कार्यालय भक्तपुरले कमलविनायकको एक खाद्य स्टोरलाई पनि कार्वाही गरेको छ । शुक्रबार भनपा-१ स्थित चुनदेवी खाद्य स्टोरलाई ३ लाख रुपैयाँ जरिवाना गरेको अनुगमन टोलीले आइतबार भनपा-१० स्थित बिनायक खाद्य स्टोरलाई २५ हजार रुपैयाँ जरिवाना गरेको हो ।
सहायक सिडिओ माधवप्रसाद शर्मा घिमिरेको नेतृत्वमा रहेको बजार अनुगमन टोलीले उक्त स्टोरमा अखाद्य चामल फेला पारेपछि कार्वाही स्वरुप जरिवाना गरेको बताइएको छ । सहायक सिडिओ शर्माले जनाए अनुसार म्याद नाघेका चामल स्टोरमा बेच्न राखिएको फेला परेपछि कार्वाही गरिएको हो ।
उपभोक्ता संरक्षण ऐन २०७५ अनुसार बिनायक खाद्य स्टोरलाई जरिवाना गरिएको सहायक सिडिओ शर्माले बताएका छन् । आइतवार बिनायक खाद्य स्टोरको आकस्मिक अनुगमन गर्न पुगेको बजार अनुगमन टोलीले अखाद्य चामल बरामद गरि नष्ट समेत गरेको छ । ९३ हजार रुपैयाँ खरिद मूल्य रहेको चामल नष्ट गरिएको सहायक सिडिओ शर्माले जानकारी गराए । साथै टोलीले अखाद्य बस्तु नबेच्न चेतावनी दिदै गल्ती नदोहोर्याउन आवश्यक निर्देशन समेत दिएको छ ।
अनुगमनमा भक्तपुर नगरपालिका, घरेलु तथा साना उद्योग कार्यालय, नेपाल प्रहरी, उद्योग वाणिज्य संघ, घरेलु तथा साना उद्योग संघ, पत्रकार महासंघ, राष्ट्रिय उपभोक्ता मञ्च लगायत सरोकार वालाहरुको सहभागिता रहेको थियो । उपभोक्ताको स्वास्थ्य माथि खेलवाड गर्दै नाफामुखी मात्र ब्यापार गर्ने ब्यापारीलाई कार्वाहीको दायरामा ल्याउन बजार अनुगमनलाई प्रभावकारी पारिएको सिडिओ रुद्रादेवी शर्माले जनाएकी छन् । उपभोक्तालाई सचेत रहन र अखाद्य बस्तु बेचिएको वा, मूल्यमा ठगिएको शंका लागे सूचना दिन समेत उनले आग्रह गरेकी छन् ।