भक्तपुरको सूर्यविनायक-५ कटुन्जेमा एक किसानले पालेको बाख्राले ५ वटा पाठापाठी पाएको छ । आफूले पालेको बाख्राले एकैबेतमा ५ वटा पाठापाठी पाएपछि उनी दङ्ग देखिएकी छन् ।                                                                              स्थानीय मीना भुजुले पालेको बाख्राले बुधवार ५ वटा पाठापाठी पाएको हो ।  यस अघि ३ बटा सम्म पाठापाठी जन्माएको स्मरण गर्दै भुजुले यसपटक भने ५ वटा पाठापाठी पाएको बताइन् । उनले बताए अनुसार जन्मिएका पाठापाठीमा ३ पाठी र २ पाठा रहेका छन् र उनीहरुको स्वास्थ्य अवस्था राम्रो रहेको छ ।                                                                                            बाख्रापालनबाट आयआर्जन गर्दै आएकी भुजु नेपाल पत्रकार महासंघ उपत्यका प्रदेशका सचिव अमर भुजुकी पत्नी हुन् । बाख्राका ५ पाठापाठी देख्दा आफ्नो पत्नीको मुहारमा खुशी छाएको उनले सुनाए । किसानहरूलाई यस्तै उन्नत जातको बाख्रा बाड्न सके किसानले श्रम अनुसारको प्रतिफल पाउनसक्ने उनको भनाइ छ । स्थानीय सरकारले किसानलाई सुखी र खुशी पार्न योजना ल्याउनुपर्नेमा जोड दिदै उनले भने, ” किसान साना खुशीमै रमाउछन् तरपनि सरकारले किसानलाई खुशी दिन सकेको छैन।” मीना भुजुले स्थानीय सरकारले आफ्नो बाख्राको नश्ल बिकासको योजना ल्याए उपहास्वरुप हस्तान्तरण गर्ने समेत मनसाय ब्यक्त गरेकी छन् ।