भक्तपुर, २१ भदौं २०७९गएराती भक्तपुर प्रहरीले अबैध कपडा ल्याएको आरोपमा एक गाडी र त्यसका चालकलाई नियन्त्रणमा लिएको छ । जगातीस्थित चेकजाँच स्थलबाट गाडी र चालक नियन्त्रणमा लिइएको हो ।
प्रहरी वृत्त जगातीबाट खटिएको प्रहरी टोलीले सवारी साधन चेकजाँच गर्ने क्रममा धनुषाको ढल्केबरबाट बर्दिबास सिन्धुली बि.पी. राजमार्ग हुँदै भक्तपुर तर्फ आउदै गरेको प्रदेश नं. २-०३-००१ ख १९९७ नं. को आईचर गाडी नियन्त्रणमा लिइएको डिएसपी राजकुमार श्रेष्ठले जनाएका छन् । गाडीको पछाडी पट्टी ढालाको भित्री साईडमा लुकाई छुपाई राखेको जुट र प्लाष्टिकको १६ वटा बोरा भित्र भन्सार छली गरी ल्याईएका कपडा बरामद भएपछि चालक सर्लाही हरिवन-११ घर भएका किरण बिश्वकर्मासहित गाडीलाई नियन्त्रणमा लिइएको उनले बताए। डिएसपी श्रेष्ठले दिएको जानकारी अनुसार उक्त गाडीमा अन्य यात्रु रहेका थिएनन ।
बरामद भएका सामानहरुमा बिभिन्न साईज तथा बिभिन्न रंगका घाघरहरु १७१० थान,बिभिन्न रंगका साडीहरु २३१ थान,बिभिन्न रंगका साईजका लेडीज ब्रा हरु ४,६९२ थान,बिभिन्न रंगका लेडीजले लगाउने वानपिस कपडा २० थान,बिभिन्न रंगका घाघरहरु ७४४ थान,बिभिन्न रंगका लेडीज कुर्था सुरुवाल थान ४८० थान रहेका बताइएको छ ।
जिल्ला प्रहरी परिसर भक्तपुरका सूचना अधिकारी एवं डिएसपी राजु पाण्डेले गाडी र चालक नियन्त्रणमा लिएको पुष्टि गरेका छन । आईचर गाडी र चालक बिश्वकर्मालाई नियन्त्रणमा लिई आवश्यक कारवाहीका लागि राजश्व अनुसन्धान कार्यालय हरिहरभवन ललितपुरमा पठाईएको उनले बताए ।