भक्तपुर ५ मंसिर २०७९ भक्तपुर निर्वाचन क्षेत्र नम्बर २ मा गठबन्धनका उम्मेदवार दुर्लभ थापाले अग्रता कायमै राखेका छन् । हाल गणना गरेको दश हजार ४ सय ३६ मतमा थापाले ४ सय ३५ मतले अग्रता हासिल गरेका हुन् ।
हालसम्म गणना गरेको मतमा दुर्लभ थापाको मत ४ हजार १ सय १९ रहेको छ भने एमाले उम्मेदवार महेश बस्नेतको ३ हजार ६ सय ८४ रहेको छ । यस क्षेत्रमा ६५ हजार ९ सय १९ मत खसेको छ । तेस्रो स्थानमा नेमकिपाकी अनुराधाले ८ सय ६९ र चौथोमा रवी लामिछानेका स्वतन्त्र पार्टीका उम्मेदवार साजन बिक ७ सय ३५ रहेका छन् ।
भक्तपुर निर्वाचन क्षेत्र नम्बर २ को मतगणना मध्यपुर थिमी स्थित बोडेमा रहेको कृषि विकाश बैंकको तालिम हलमा भई रहेको छ । १ सय ५ मतदान केन्द्र रहेको यो क्षेत्रका १६ मतदान केन्द्रको मतपरिणाम सार्वजनिक भएको हो ।
अपडेट : भक्तपुर क्षेत्र नं. २ को २० हजार ३ सय ९३ मत गणना हुँदा गठबन्धनका उम्मेदवार दुर्लभ थापाले ९ सय १६ मतले अग्रता बढाएका छन् । हरेक पटक मत परिणाम सार्वजनिक हुँदा अग्रता कायम राखेका थापाले एमाले उम्मेदवार महेश बस्नेतलाई अग्रताको अवसर दिएका छैनन् ।
निर्वाचन अधिकृत लोकनाथ पराजुलीका अनुसार थापाले ८ हजार १ सय २५ मत प्राप्त गर्दा महेश बस्नेतले ७ हजार २ सय ९ मतका साथ पछ्याई रहेका छन् ।
हालसम्म नेपाल मजदुर किसान पार्टीकी अनुराधा थापा मगर तेस्रो स्थानमा छिन । उनले १ हजार ५ सय ६ मत पाएकी छन् । त्यस्तै राष्ट्रिय स्वतन्त्र पार्टीका साजन विकले १ हजार ४ सय ७७ मतका साथ चौंथो स्थानमा रहेका छन ।