![](https://bhaktapurpost.com/wp-content/themes/onlineparda/images/1px.gif)
नेपाली कांग्रेसका जिल्ला सभापति रहेका गठबन्धनका साझा उम्मेदवार दुर्लभ थापाले भक्तपुर-२ मा बिजय प्राप्त गरेका छन् । निकटत्तम प्रतिस्पर्धी रहेका पूर्व मन्त्री एवं निवर्तमान सांसद एमाले उम्मेदवार महेश बस्नेतलाई पराजित गर्दै उनले बिजय प्राप्त गरेका हुन् ।
बिहीवार बिहान सम्पन्न मतगणना अनुसार कांग्रेसका थापाले एमालेका बस्नेतलाई ९ सय ६७ मतान्तरले पछि पार्दै बिजय प्राप्त गरेका निर्वाचन अधिकृतको कार्यालयका एक कर्मचारीले भक्तपुर पोस्टलाई बताए । उनका अनुसार थापाले २४ हजार २ सय ३९ मत प्राप्त गर्दा बस्नेतले २३ हजार २ सय ८२ मत प्राप्त गरेका छन् । यस निर्वाचन क्षेत्रमा ६५ हजार ९ सय १९ मत खसेको थियो । चार दिन देखि जारी मतगणनाको सार्वजनिक नतिजा प्रत्येक पटक निकै प्रतिस्पर्धात्मक र रोमान्चक बनेको थियो । हरेक पटक थापाले अग्रता लिएका भएपनि बस्नेतले निकै कम अंकको मतान्तर दिदै हरेकपटक कडा चुनौती पेश गरेका थिए । अन्ततः अन्तिम नतिजा पनि थापाकै पक्षमा आएपछि बस्नेत हार ब्यहोर्न बाध्य बन्न पुगेका छन् ।
अघिल्लो निर्वाचनमा कांग्रेस उम्मेदवार रहेका हेभिवेट नेता दमननाथ ढुंगानालाई डबल मतले पराजित बनाएका बस्नेतलाई यस पटक भने प्रतिनिधि सभा प्रवेश गर्नबाट रोक्न कांग्रेसकै जिल्ला सभापति रहेका नेता दुर्लभ थापा सफल बन्न पुगेका छन् ।
कांग्रेसका थापालाई तेब्बर मतान्तरले जित्ने दावी गरेका बस्नेतलाई हारको स्वाद चखाउन सफल भएपछि गठबन्धनका कार्यकर्ता उत्साहित भएका छन् । एकाबिहानै देखि बोडेस्थित मत गणनास्थलमा नेताकार्यकर्ताहरु बधाई तथा शुभकामना साटासाट गरिरहेका कांग्रेसका नगर प्रवक्ता रमेश खड्काले बताएका छन् । जीतको खुसियालीमा गठबन्धनका नेताकार्यकर्ता रमाइरहेका छन् । यस क्षेत्रको प्रदेश सभा तर्फ भने १ मा एमाले उम्मेदवार किरण थापामगर र २ मा गठबन्धनका डा राजेन्द्रमान श्रेष्ठ जीत हासिल गर्न सफल भएका छन् ।