भक्तपुर, ८ मंसिर २०७९ भक्तपुर क्षेत्र नं. १ मा नेपाल मजदुर किसान पार्टी उम्मेदवार प्रेम सुवालले पुनः विजय प्राप्त गरेका छन् । नेमकिपाको किल्लाका रुपमा रहेको भक्तपुर क्षेत्र नम्बर १ को पछिल्लो परिणाममा सुवालले ४२ हजार बढी मत हासिल गर्दै तेब्बर भन्दा बढी मतान्तरले बिजयी बनेका हुन् ।
बिहिवार बिहान सम्पन्न मतगणनामा सुवालले ४२ हजार ७ सय ६१ मत ल्याएर विजयी भएका मुख्य निर्वाचन अधिकृत गोपालप्रसाद बास्तोलाले बताए । उनका निकटतम प्रतिद्वन्द्वीको रुपमा नेकपा एमालेका नवराज गेलाल रहन सफल भएका छन् ।सुवालले ४२ हजार ७ सय ६१ मत पाउँदा एमालेका गेलालले ११ हजार ९ सय ५८ मत पाएका छन्। राप्रपाका उम्मेदवार भरतबहादुर खड्का भने करिब १० हजार मतसहित तेस्रो बन्न पुगेका छन् । सत्ता गठबन्धनका साझा उम्मेदवार नेकपा माओवादी केन्द्रका सुनिल गोठेलाई नेपाली कांग्रेसको मत प्राप्त नहुँदा चौथो स्थानमै चित्त बुझाउनुपरेको छ ।
क्षेत्र नम्बर १ को प्रदेश सभा २ भक्तपुर नगर क्षेत्रमा नेमकिपाका उम्मेदवार सुरेंद्राराज गोसाई करिब १० गुणा बढी मत ल्याई बिजयी बनेका छन् भने प्रदेश सभा १ मा गठबन्धनका सुरेश श्रेष्ठ निर्वाचित बनेका छन् ।