भक्तपुर, ११ मङ्सिर २०७९ रुकुमपूर्वको स्वास्थ्य चौकीलाई जिल्ला अस्पताल घोषणा गरेको पाँच वर्षपछि अप्रेशन सेवा सुरु गरेको छ । शनिबार अस्पतालमा सुत्केरी हुने समय नाघेको र नर्मल डेलिभरी हुन नसकेका एक गर्भवती महिलाको पहिलो पटक अप्रेशन गरेको हो ।
अस्पताल मा पहिलो पटक अप्रेशन गरी बच्चा जन्माउँने रुकुमपूर्व भूमे गाउँपालिका –८, का सन्तु बुढा रहेका छन् । उनको अप्रेशन डा. नारायण बरालको टिमले सफलतापुर्वक गरेकको जिल्ला अस्पतालले जनाएको छ । अस्पतालका डा. पूर्णबहादुर पुनका अनुसार यो अस्पतालको पहिलो अप्रेशन हो ।
नर्मल डेलिभरी गर्न औषधीले समेत काम नगरेपछि अप्रेशन गरिएको अस्पतालका मेडिकल सुपरिटेन्डेन्ट सपना बिकको भनाइ छ । उनका अनुसार अहिले आमाबच्चा दुबैको स्वास्थ्य अवस्था सामान्य रहेको छ ।
नेपालको संविधानअनुसार रुकुमपूर्व छुट्टै जिल्ला घोषणा भएपछि २०७४ पुस ७ गते रुकुमकोटमा रहेको स्वास्थ्य चौकीलाई जिल्ला अस्पताल घोषणा गरिएको थियो । यसको औपचारिक उदघाटन भने २०७६ मङसिर ५ गते गरिएको थियो ।