भक्तपुर, १५ मंसिर २०७९भक्तपुर नगरपालिकाका प्रमुख सुनिल प्रजापतिले विपद् जोखिम अप्रत्यासित रुपमा आइपर्ने काबु बाहिरको परिस्थिति भएले यसबाट जोगिनको लागि सदा तत्पर रहनुपर्ने विचार व्यक्त गरेका छन् । नगरपालिकाले जनप्रतिनिधि र कर्मचारीहरुको लागि बुधबार आफ्नै सभाहलमा संचालन गरेको २ दिने विपद् व्यवस्थापनसम्बन्धी तालिममा उनले सो विचार व्यक्त गरेका हुन् ।
प्रमुख प्रजापतिले भक्तपुर नगरपालिकाले कोभिड नियन्त्रण र रोकथामको लागि गरेको व्यवस्थापन उत्कृष्ट भई बागमती प्रदेश मुख्यमन्त्रीको कार्यालयबाट विपद्सेवी पदकबाट सम्मान गरिएको स्मरण गर्दै कोभिडकै समयमा जनताको सहयोगबाट अक्सीजन प्लान्ट स्थापना गर्न सफल भएको तथा नगरबासीहरुले निःशुल्क अक्सीजन प्राप्त गरिरहेको जानकारी दिए ।
“विपद्बाट भाग्ने होइन यसबाट नयाँ कुरा सिक्नुपर्छ” भन्दै उनले विपद्सम्बन्धी पूर्वतयारी र विपद्बाट जोखिगन सँधै तत्पर रहन बलियो संरचना निर्माण गर्नुपर्ने र नगरस्तरीय विपद् व्यवस्थापन समिति विपद्को समयमा सकृय हुन र विपद्लाई रोकथाम गर्नका लागि तत्पर रहन विपद् व्यवस्थापन तालिम प्रदान गरी जनशक्ति तयार गरिरहेको जानकारी गराए । उनले नगरपालिकाले भूकम्प प्रतिरोधी घरहरु निर्माण गर्न डकर्मी तालिम तथा विपद् व्यवस्थापन तालिम सञ्चालन गरिरहेको समेत बताए ।