भक्तपुर, १६ मङ्सिर २०७९”शिक्षामा प्रविधिको प्रयोग, आजको आवश्यकता” विषयक बक्तृत्वकला प्रतियोगितामा मोर्डन बोर्डिङ्ग स्कूलकी छात्रा समिक्षा खनालले प्रथम स्थान प्राप्त गरेकी छन् । शुक्रवार सम्पन्न प्रतियोगितामा उनी प्रथम हुन सफल भएकी हुन् ।
खनाल मोर्डनमा कक्षा १२ मा अध्ययनरत रहेकी छन् । अन्तिम प्रतिस्पर्धाका लागि छनौट भएका ११ प्रतिस्पर्धीलाई पछि पार्दै उनी प्रथम भएकी आयोजकले जनाएको छ । उच्च शिक्षालय तथा माध्यमिक विद्यालय सङ्घ नेपाल (हिसान) भक्तपुरको आयोजना र विनायक शिक्षा निकेतन, थिमिको सहकार्यमा उक्त बक्तृत्वकला शुक्रवार सम्पन्न भएको हो ।प्रतियोगितामा हिसान भक्तपुरसंग आवद्ध विद्यालयका विद्यार्थीहरु सम्मिलित थिए ।
प्रतियोगितामा काठमाडौ वर्ल्ड स्कूलकी अन्जु त्रिपाठीले द्वितीय र मोर्डनकै सृजन बस्नेतले तृतीय स्थान प्राप्त गरेका हिसान भक्तपुरका अध्यक्ष अनिल कस्पालले जनाएका छन् । अध्यक्ष कस्पालको अध्यक्षतामा सम्पन्न कार्यक्रममा प्रमुख अतिथि नवनिर्वाचित बागमती प्रदेश सभा सदस्य डा राजेन्द्रमान श्रेष्ठले प्रतियोगितामा प्रथम द्वितीय र तृतीय स्थान प्राप्त गर्न सफल प्रतियोगी विद्यार्थीलाई पुरस्कार वितरण समेत गरेका थिए । उक्त अवसरमा आयोजकले प्रमुख अतिथि श्रेष्ठलाई प्रदेश सभा सदस्य निर्वाचित भएकोमा सम्मान पत्र समेत प्रदान गरेको थियो ।