भक्तपुर, २२ मङ्सिर २०७९ वायु प्रदूषणको मुख्य कारण गाडीबाट निस्कने धुवाँ र खुलारुपमा जलाउने फोहर रहेकाले वन तथा वातावरण विभागले प्रदूषण जाँच गरेर मात्र सवारी साधन चलाउन आग्रह गरेको छ अन्यथा जरिवाना गर्ने चेतावनी दिएको छ । विभागले गाडी चालकलाई मात्र नभई खुल्ला रुपमा फोहोर जलाउने समेत कारवाही गर्ने जनाएको हो ।
विभागले बिहिबार सूचना जारी गरी आगामी पुस १ गते पछि विभागको परीक्षणमा प्रदूषण जाँचपास हुन नसक्ने सवारी साधनहरुलाई एक लाख रुपैयाँसम्म जरिवाना गर्ने चेतावनी दिएको हो । हरियो स्टिकर जारी भएको अवधि बाँकी रहेको अवस्थाका सवारी साधनमा पनि जुनसुकै बेला छड्के जाँच गर्ने र कारबाही गर्ने विभागले जनाएको छ ।
साथै आफ्नो टोल छिमेकमा कसैले खुल्ला रुपमा फोहोर जलाउने काम गरिरहेको भए पनि जानकारी दिन विभागले भनेको छ । त्यस्तो जानकारी दिनेको परिचय गोप्य राख्ने र खुल्ला रुपमा फोहोर जलाउनेलाई कारबाही गर्ने चेतावनी विभागले दिएको हो ।