भक्तपुर, ७ पुस २०७९ गण्डकी प्रदेशस्तरीय तेस्रो विद्यालय नाटक महोत्सव–२०७९ सुरु हुने भएको छ । आगामी माघ १५ गतेबाट महोत्सव माघ २१ गते शनिबारसम्म चल्नेछ । वार्षिक रूपमा गरिँदै आएको महोत्सवका लागि थिएटरले नाटकहरूको आह्वान गरेको छ ।
‘विद्यालयमा रङ्गमञ्च : अर्थपूर्ण बाल सहभागिताको आधार’ मूल नाराका साथ आयोजना हुने महोत्सवमा सहभागिताका लागि विभिन्न छनोट चरण पार गर्नुपर्नेछ । पहिलो चरणमा नाटकको कथावस्तु अध्ययन गरिनेछ । त्यसका लागि यही पुस २० भित्र नाटकको कथावस्तु पठाइसक्नुपर्ने पोखरा थिएटरका निर्देशक परिवर्तनले जानकारी दिए ।
उनले भने, “नाटक नेपाली र समयावधि घटीमा ४० मिनेटदेखि बढीमा एक घण्टासम्मको हुनुपर्नेछ।” महोत्सवका लागि २१ नाटक छनोट गर्ने तयारी गरिएको छ । पहिलो चरणमा नाटकको स्क्रिप्ट अध्ययन गरिनेछ । अध्ययन गरिएका स्क्रिप्टबाट कथावस्तु, भाषाशैली, संवाद, प्रस्तुतीकरण, मञ्चन, मौलिकतालगायतलाई आधार मानी नाटक छनोट गरिने संयोजक परिवर्तनले जानकारी दिए ।
