भक्तपुर, ८ पुस २०७९ पत्रकारिताको मर्यादामाथि गम्भीर हुन राष्ट्रपति विद्यादेवी भण्डारीले आग्रह गरेकी छन् । सुर्खेतमा शुक्रबार आयोजित नेपाल पत्रकार महासंघको केन्द्रीय साधारण सभाको उदघाटन गर्दै राष्ट्रपति भण्डारीले सो आग्रह गरेकी हुन् ।
पत्रकारितालाई स्वच्छ, निस्पक्ष, मर्यादित र विश्वसनियतामा गम्भीर चिन्तन गर्न पनि उनले पत्रकारसँग आग्रह गरे । अधिवेशनको उदघाटन गर्दै राष्ट्रपति भण्डारीले नेपालमा निरंकुश राजतन्त्रको अन्त्य र प्रजातन्त्र स्थापनामा पत्रकारको योगदान महत्वपूर्ण रहेको बताएकी छन् ।
मुलुकको प्रणालीले राम्रोसँग काम गर्न नसके प्रजातन्त्रको औचित्य नहुने भन्दै राज्यका निकायले जनताको सुरक्षाको ग्यारेण्टी गरिनुपर्ने राष्ट्रपति भण्डारीले बताए । राज्यले सबैलाई समान अवसर देओस् भन्ने जनताको चाहना रहेकाले सरकार त्यसतर्फ ध्यान केन्द्रित गर्न आवश्यक रहेको राष्ट्रपति भण्डारीले चर्चा गरे ।
‘जनताको अपेक्षा पूरा नहुँदा राज्यप्रति असन्तुष्टि प्रस्तुत भैरहेको छन्’ राष्ट्रपति भण्डारीले भने, ‘हामी जिम्मेवार बन्नु पर्नेछ । शासनशैली सुधार गर्नुछ । राज्यको चौथो अङ्गको रूपमा रहेको सञ्चार माध्यम पनि उतिकै भूमिकामा रहनुपर्छ ।’ डिजिटल प्रविधिको उच्चतम् प्रयोगसँगै सामाजिक सञ्जालले पत्रकारितालाई छायाँमा पार्न खोजेको उनको भनाइ छ ।
पत्रकारिता लोकतन्त्रको अपरिहार्य पक्ष भएकाले यसले नागरिकको सूचनाको हक प्रत्याभूत गराउन र प्रेस स्वतन्त्रतालाई पूर्ण कार्यान्वयनमा अग्रसर हुनुपर्ने बताए । गोरखापत्र