भक्तपुर, २७ पुस २०७९ भक्तपुरमा कानुन बिपरित संचालनमा रहेका ढुङ्गा र बालुवाको खानी भएको नभएको यकिन गर्न अनुगमन टोली बनाइएको छ । सहायक प्रमुख जिल्ला अधिकारी माधवप्रसाद शर्माको नेतृत्वमा एक अनुगमन टोली गठन गरिएको हो ।
अबैध क्रसर उद्योग बन्द गर्न गृह मन्त्रालयले परिपत्र गरेपछि त्यस्तो उद्योग भए नभएको यकिन गर्न अनुगमन तीब्र बनाइएको सिडिओ कार्यालय श्रोतले जनाएको छ । अनुगमन टोलीले घरेलु तथा साना उद्योग कार्यालयमा उत्खननको उदेश्य राखी दर्ता भएका उद्योगहरुलाई निगरानीमा राखी अनुगमन गरिरहेको बताइएको छ ।
साथै, त्यस्ता उद्योग बिना दर्ता पनि संचालन भएका देखिएमा तुरुन्त सूचना दिन स्थानीय प्रहरी, अनुसन्धान बिभाग र स्थानीय सरकारसंग आग्रह गरिएको बुझिएको छ । बिपद ब्यवस्थापन समितिको बैठकमा प्रमुख जिल्ला अधिकारी रुद्रादेवी शर्माले त्यस्ता उद्योगलाई तुरुन्त बन्द गर्ने बताउँदै सूचना र सहयोगका लागि आग्रह गरेकी एक सहभागीले जानकारी गराएका छन् ।
अबैध खानी संचालनले प्राकृतिक प्रकोपको जोखिम बढ्ने बताउँदै सिडिओ शर्माले स्थानीय सरकार समेत यसमा सजग भइ जथाभावी खानी उत्खननको अनुमति दिन नहुने बताएकी थिइन् । श्रोतका अनुसार बैठकमा जिसस प्रमुख इश्वर बहादुर थापाले प्राकृतिक प्रकोप बाट बच्न जनचेतना र पूर्वतयारीमा जोड दिएका थिए । त्यसैगरी सूर्यविनायकका मेयर बासुदेव थापा, चागुनारायणका मेयर जीवन खत्री, भक्तपुरकी उपमेयर रजनी जोशी र मध्यपुर थिमिका प्रतिनिधि भगिरथ अधिकारीले आ-आफ्नो नगरमा प्रकोपको जोखिम र त्यसबाट बच्न गरिएका तयारी बारे अवगत गराएका बताइएको छ ।
उक्त अवसरमा सशस्त्र प्रहरी बल २२ नम्बर गणका गणपति नरबहादुर रावतले बिकासे आयोजनाका नाममा अबैध खानी संचालन भएको हुनसक्ने तर्फ सचेत भइ सबै क्षेत्रमा निगरानी, अनुगमन र कार्वाही लाई प्रभावकारी बनानुपर्ने बताएका थिए ।
सहायक सिडिओ माधव प्रसाद शर्माले अबैध खानी बन्द गराउन र संचालकलाई कार्वाही गर्न आफ्नो नेतृत्वमा अनुगमन टोली बनेको पुष्टि गरेका छन् । उनले कसैसंग यस्तो उद्योग संचालनको सूचना भए सिडिओ कार्यालयमा जानकारी गराउन समेत आग्रह गरे । श्रोतका अनुसार ३ उद्योग शंकाको घेराभित्र परेका छन् । तर, सहायक सिडिओ शर्माले यसबारे बताएका छैनन् । उनले छिट्टै प्रतिवेदन पेश गर्ने प्रतिक्रिया दिए ।