भक्तपुर, १ माघ २०७९प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले भौतिक विकासले मात्र मानव जातिको हित गर्न नसक्ने निष्कर्ष सहित विश्वले नै योग प्रति चासो बढाइरहेको बताउदै त्यसमा नेपालीले गौरव गर्नुपर्नेमा जोड दिएका छन् । योग, ध्यान र आध्यात्मिक चिन्तन नेपालको धेरै पुरानो मौलिक परम्परा भएको प्रष्ट पार्दै प्रधानमन्त्री प्रचण्डले विश्वले यसलाई आत्मसाथ गर्दै अघि बढेकोमा गौरव गर्नुपर्नेमा जोड दिएका हुन् ।
सानोठिमी स्थित सिटिईभिटी प्रांगणमा आइतवार बिहान आयोजित ८ औं राष्ट्रिय योग दिवसको मुल समारोहलाई सम्बोधन गर्दै प्रधानमन्त्री प्रचण्डले भने, ”भौतिक रुपले विकासित् भनिएका देशमा मनोबैज्ञानिक रुपले मानिसहरु असाध्यै कमजोर रहेका छन्, मानव जातिको सन्तुलन कायम राख्नको लागि योग ध्यान सर्वोत्तम उपाय हो भन्ने कुरा वैज्ञानिकरुपले पुष्टि भइसकेको छ, ।”
प्रधानमन्त्री प्रचण्डले नेपालीको पहिचानसंग पनि जोडिएको योग र ध्यानलाई विद्यालय शिक्षामै समावेश गरी विश्व विद्यालयसम्म लानुपर्ने आवश्यकता समेत औल्याएका छन् । त्यसो गर्ने सके मात्रै संसारभरी योग प्रशिक्षक दिन सकिने र नेपाललाई नयाँ पहिचानमा पुर्याउन सकिने उनले प्रष्ट पारे ।
आफूले यस कार्यकालमा सरकार प्रमुखको हैसियतले जनताको पक्षमा नयाँ योजना र संकल्प सहित कार्यभार सम्हालेको स्मरण गराउँदैं उनले योगलाई नयाँ उचाइमा पुर्याउनका लागि शिक्षामा योगलाई जोड्ने प्रक्रिया शुरु गर्ने प्रतिवद्धता समेत प्रकट गरेका थिए ।
उक्त अवसरमा प्रधानमन्त्री प्रचण्डले योग गुरुको निर्देशन पालन गर्दै केहीबेर योग समेत गरे । प्रधानमन्त्री प्रचण्डलाई योग साधक र स्थानीयले भक्तपुरमा भब्य स्वागत गरेका थिए ।