भक्तपुर, १३ माघ २०७९उपप्रधान एवं गृहमन्त्री रवि लामिछानेको सांसद र मन्त्री पद खारेज हुनेगरी सर्वोच्च अदालतले उनको नागरिकता सम्बन्धि मुद्दाको फैसला सुनाएसंगै लामिछानेले पदबाट राजिनामा दिएका छन् । उनको राजिनामाले राजनीतिक बृत्तमा नयाँ तरङ्ग पैदा भएको छ भने यस विषयमा विभिन्न प्रतिक्रिया पनि आइरहेका छन् ।
यसैबीच सत्तारुढ दल नेकपा (माओवादी केन्द्र)का बागमती प्रदेश अध्यक्ष एवं प्रदेश सांसद सरल पौडेल सहयात्रीले रवि नीरस बन्दै गएको नयाँ पुस्ता र राजनीतिक बितृष्णाले बिरक्तिएको युवा पंक्तिका बीच एक आशाको चिंगारी भएको भन्दै हिम्मत नहार्न सुझाव दिएका छन् । रविले कानुनी मान्यतालाई सम्मान गर्दै धुलो टक्टक्याएर अघि बढ्नुपर्ने उनले प्रतिक्रिया दिएका छन् । रवि राजनीतिक बैधताको हिसावले जनअनुमोदित लोकप्रिय युवा नेता रहेकोले उनीप्रति सम्मान ब्यक्त गर्दै अध्यक्ष सहयात्रीले युवाहरु प्रतिको आशा र बिश्वास कायम राख्न रवि दरो गरि उभिनुको बिकल्प नभएको बताएका छन् ।
“रविको नागरिकता प्रकरण गम्भीर कानुनी लापर्वाही हो । कानुन अनुसार अदालतले यो भन्दा अर्को निर्णय गर्न सक्दैन थियो ।” उनले भने । नागरिकता जस्तो बिषयमा समेत लापर्वाही गर्दा नयाँ पुस्ताको असाध्य गह्रुंगो आशालाई बोकेर हिंड्न सक्छ ? भन्ने प्रश्न खुट्टा टेक्न नपाउदै पेचिलो र गंभिर भएको उनको भनाइ छ । राजनीतिक आस्था फरक भएतापनि आफु एक युवा भएको नाताले रविलाई हिम्मत नहारी अघि बढ्न अध्यक्ष सहयात्रीले शुभकामना समेत दिएका छन् ।
रविले अमेरिकी नागरिकता त्यागिसकेकाले तत्काल जिल्ला प्रशासन कार्यालय, काठमाडौंमा गएर नेपाली नागरिकता प्राप्त गर्न सक्ने बाटो भने खुला नै रहेको छ ।नागरिकता प्राप्त गरि गैर सांंसदको रुपमा उनी पुन मन्त्रीमा नियुक्त हुने बाटो पनि बन्द भएको भने छैन । पत्रकारिताबाट राजनीतिमा प्रवेश गरि राष्ट्रिय स्वतन्त्र पार्टी स्थापना गरेका लामिछाने जनता माझ लोकप्रिय रहेका छन् । उनी रास्वपाका अध्यक्ष हुन् । रवि आफैले भने अदालतले अनागरिक बनाइदिएको बताउदै थप कुरा बोल्न चाहेका छैनन् ।