भक्तपुर, २२ माघ २०७९ त्रिभुवन विश्वविद्यालयका २६ वर्ष पुराना विद्यार्थीहरुले मौका परीक्षा दिने अवसर मिलेको छ । परीक्षा नियन्त्रण कार्यालय (पनिका)ले तीन वर्षे स्नातक तहअन्तर्गत व्यवस्थापन, शिक्षाशास्त्र, मानविकी तथा सामाजिकशास्त्र र विज्ञान तथा प्रविधि अध्ययन संस्थानअन्तर्गत भर्ना भएका विद्यार्थीलाई यस्तो मौका दिएको हो ।
२०५३ सालदेखि भर्ना भएका तर प्रयोगात्मक परीक्षा रोकिएका सबै परीक्षार्थीले यो मौका परीक्षा अवसर दिएको परीक्षा नियन्त्रक पुष्पराज जोशीले बताएका छन् । स्नातक तहमा भर्ना भए पनि प्रयोगात्मक परीक्षामा अनुपस्थित भएका कारण उत्तीर्ण हुन नसकेका २६ वर्ष पुराना विद्यार्थीलाई मौका परीक्षाको अवसर दिएको हो ।
हाल स्नातक तहअन्तर्गत सम्पूर्ण सङ्काय चार वर्षे भइसकेको छ । तीन वर्षे शैक्षिक कार्यक्रममध्ये जुन सङ्कायमा भर्ना भएको भए पनि पहिलो, दोस्रो वा तेस्रो वर्षमा प्रयोगात्मक परीक्षा दिनबाट छुटेका परीक्षार्थीलाई मौका दिइएको हो ।
मौका परीक्षामा सहभागी हुन चाहनेले आगामी फागुन ९ गतेभित्र सम्बन्धित क्याम्पसमा परीक्षा फाराम भर्नुपर्ने पनिकाले जनाएको छ । साथै सम्बन्धित विद्यार्थीले पूरा गर्नुपर्ने प्रयोगात्मक परीक्षा, परियोजना कार्य तथा शिक्षण अभ्यासलगायतका सम्पूर्ण कामको प्रक्रिया पूरा गरी आगामी चैत १५ गतेभित्र सोको विवरण बुझाउन पनि पनिकाले निर्देशन दिएको छ ।