भक्तपुर, २६ माघ २०७९सत्तारुढ दल नेकपा (माओवादी केन्द्र) ले भक्तपुरकी नेतृ उमा कपालीलाई बैकल्पिक केन्द्रीय सदस्य बनाएको छ । पार्टीको बागमती प्रदेश समिति सदस्य रहेकी कपालीलाई बैकल्पिक केन्द्रीय सदस्यको जिम्मेवारी दिइएको हो ।
माओवादी केन्द्रका भक्तपुर इन्चार्ज दिलिप प्रजापति भीष्म ले कपाली बैकल्पिक केन्द्रीय सदस्य मनोनीत भएकी पुष्टि गरेका छन् । पार्टीको पदाधिकारी र स्थायी समिति बैठकले बैकल्पिक केन्द्रीय समिति बनाउदै २ सय २ जनालाई जिम्मेवारी दिनेक्रममा भक्तपुरकी कपाली पनि उक्त समितिमा परेकी बताइएको छ ।
भक्तपुर नगर इन्चार्ज समेत रहेकी कपाली माओवादी केन्द्रको जनयुद्धकालीन नेतृ हुन् । पहिलो संविधान सभामा उनी संविधान सभा सदस्य समेत रहेकी थिइन् । उनी जिल्ला संयोजक सुनिल गोठेकी पत्नी पनि हुन् ।
पछिल्लो निर्णय अनुसार माओवादी केन्द्रमा पदाधिकारी संख्या २२ रहेको छ । उपमहासचिव रहेका पम्फा भुसाल र अग्निप्रसाद सापकोटा उपाध्यक्षमा पदोन्नति भएका छन् । स्थायी समिति ४४ जनाको बनेको छ भने केन्द्रीय समिति ३ सय ८६ जना र बैकल्पिक केन्द्रीय समिति २ सय २ जना थप गरि ५ सय ८८ सदस्यीय बनेको बताइएको छ ।