वागमती प्रदेश सरकारले जनयुद्ध दिवसको अवसरमा सार्वजनिक बिदा दिएको छ । जनयुद्ध दिवसका दिन फागुन १ गते सार्वजनिक बिदा दिइएको हो ।

मन्त्रिपषिद्को बैठकले जनयुद्ध दिवसको अवसरमा सार्वजनिक बिदा दिने सर्वसम्मत निर्णय गरेसंगै प्रदेश सरकारले एक सूचना जारी गर्दै फागुन १ गते प्रदेशभरी सार्वजनिक बिदा दिने घोषणा गरेको मुख्यमन्त्री शालिकराम जमरकट्टेलका प्रमुख राजनीतिक सल्लाहकार डिपी ढकालले जानकारी दिए । आन्तरिक मामिला तथा कानून मन्त्रालयका प्रवक्ता अनुशील सापकोटाले सो सम्बन्धमा बिहीबार एक सार्वजनिक सूचना समेत जारी गरिसकेका छन् ।                          वर्तमान राजनीतिक ब्यवस्था र परिवर्तनमा तत्कालीन नेकपा माओवादीले जनतालाई गोलबन्द गरि गरेको जनयुद्धको भूमिकालाई सम्मान गर्दै जनयुद्ध दिवसका अवसरमा प्रदेश सरकारले सार्वजनिक बिदा घोषणा गरेको बताइएको छ । यसले इतिहासको संरक्षण गर्न र जनयुद्धको महत्व नयाँ पुस्तालाई बुझाउन मद्दत मिल्ने प्रदेश सरकारले बिश्वास लिएको प्रमुख राजनीतिक सल्लाहकार ढकालले बताए ।                              तत्कालीन नेकपा(माओवादी) को नेतृत्वमा सामन्ती राजतन्त्रात ्मक एकात्मक राज्य सत्ता बिरुद्ध जनताको शासन स्थापना गर्ने उदेश्यले २०५२ फागुन १ गते जनयुद्धको घोषणा गरिएको दिनलाई जनयुद्ध दिवसको रुपमा मनाइदै आएको छ । नेपालमा १० वर्ष सम्म चलेको जनयुद्धका सुप्रीम कमान्डर रहेका प्रचण्ड हाल देशका प्रधानमन्त्री रहेका छन् । जनयुद्धको कारण देशमा राजनीतिक ब्यवस्था बदलिएर संघीय लोकतान्त्रिक गणतन्त्रको स्थापना सम्भव भएको छ । देशमा  नयाँ संविधान संगै थुप्रै सकारात्मक परिवर्तन आएका छन् र हिजो पछाडि पारिएका वर्ग, लिङ्ग, क्षेत्र र समुदायले बिबिध क्षेत्रमा आरक्षण र अवसर प्राप्त गर्न सफल भएका छन् ।