भक्तपुर, २७ माघ २०७९ प्रमुख सत्तारुढ दल नेकपा (माओवादी केन्द्र)ले आजबाट संगठन सुदृढीकरणका लागि प्रदेश समन्वय समितिका बैठक गर्दैछ । बिहीबार साँझ भर्चुअल माध्यमबाट केन्द्रीय कार्यसमिति बैठक सम्पन्न गरे लगत्तै आजबाट प्रदेश समन्वय समितिको बैठक सुरु गर्न लागेको हो ।
सबै प्रदेशमा समन्वय बैठक आगामी ५ फागुनसम्ममा सक्नेगरी आजबाट सुरु गर्न लागिएको माओवादीले जनाएको छ । समन्वय समिति बैठकबारे माओवादीले सम्वन्धित प्रदेश समन्वय समितिलाई पत्रचार गरिसकेको छ ।
माओवादी केन्द्रीय कार्यालयका अनुसार आज शुक्रबार प्रदेश १ र बागमती प्रदेशमा प्रदेश समन्वय समिति बैठक बस्नेछन् । मधेश प्रदेश माघ २८ गते शनिबार, गण्डकी प्रदेश माघ २९ गते आइतबार समन्वय समिति बैठक बस्नेछ ।
फागुन एक गते जनयुद्ध दिवस मनाउननका लागि बैठक राखिएको छैन ।
लुम्बिनी प्रदेश र सुदुरपश्चिम प्रदेश फागुन २ गते, कर्णाली प्रदेश र प्रवास प्रदेशमा फागुन ३ गते र उपत्यका विशेष र सम्पर्क समन्वय प्रदेशमा फागुन ५ गते बैठक बस्ने माओवादीले कार्यतालिका बनाएको छ ।
बेठकमा वर्तमान राजनीतिक अवस्था, संगठन सुदृढीकरणलगायत विषयमा छलफल हुनेछ ।