भक्तपुर, २७ माघ २०७९राष्ट्रपति विद्यादेवी भण्डारीले देशको अर्थतन्त्र प्रति चिन्ता व्यक्त गर्दै अर्थतन्त्रको सुदृढीकरणका लागि गम्भीर पाइला चाल्नुपर्ने आवश्यकात औल्याएकी छन् । शुक्रबार सङ्घीय संसद्को संयुक्त बैठकलाई सम्बोधन गर्दै उनले अल्पकालीन र दीर्घकालीन समाधान खोज्न आग्रह गरिन ।
तत्काल अर्थतन्त्रका सूचकमा सुधार देखिएको भएतापनि भरपर्दो नभएको उनको भनाइ छ । यस विषयमा सबै जानकार रहेको जिकिर गर्दै उनले उत्पादन क्षेत्रमा गम्भीर बन्नुपर्ने बताइन ।
उहाँले बढ्दै गएको व्यापार घाटालाई कम गर्न उत्पादन क्षेत्रमा गम्भीर बन्नुपर्नेमा उनले जोड दिएकी हुन् । ”कोभिड–१९ र डेंगुलाई देखाएर पन्छिने अवस्था छैन।’’ उनले भनिन ।
पुँजीगत बजेट खर्च नहुँदा पुँजी निर्माणमा बाधा हुने गरेको उल्लेख गर्दै उनले यसतर्फ ध्यानाकर्षण गराइन । लक्ष्य अनुसार राजस्व सङ्कलन गर्न सरकारलाई निर्देशन दिदै उनले लक्ष्य अनुसारको राजस्व सङ्कलन नहुनु र वैदेशिक सहायता परिचालनमा कमी आउँदा खर्च धान्न गाह्रो भएको भनेकी छन् । मुद्रा तरलता अभावको स्थितिमा ब्याजदर बढ्न गएर लागत अनुमान बढ्दा उद्योगी व्यवसायीसंगै आम उपभोक्तालाई असर पर्ने देखिएकाले यसको समाधानको उपाय खोज्नपर्नेमा उनले जोड दिएकी छन् ।
व्यापारघाटा तत्काल कम गर्न कठिन रहेपनि निर्यात प्रवर्द्धनका ठोस पहल गर्नुपर्ने उनले प्रष्ट पारिन । आन्तरिक उत्पादन बढाउन उनले आग्रह गरेकी छन् ।