काठमाडौं उपत्यकामा सार्वजनिक यातायात बन्दको कार्यक्रम फिर्ता भएको छ ।

भौतिक पूर्वाधार तथा यातायात मन्त्री नारायणकाजी श्रेष्ठको पहलमा बार्ता भएपछि सो बन्द फिर्ता भएको हो। यातायात मजदूर र यातायात महासंघबीच भएको वार्तामा यातायात बन्द फिर्ता लिने सहमति बनेको उपप्रधानमन्त्री श्रेष्ठको सचिवालयले जनाएको हो ।

बन्दका कारण जनजीवन प्रभावित भएको थियो । नागरिकले सास्ती खेपिरहेका थिए । भक्तपुरको जगातीमै यातायात मजदुरले सार्वजनिक यातायात रोक्दा कार्यालय जाने कामकाजी मानिसले सास्ती भोग्नु पर्यो । बन्दबारे थाहा नहुदा मानिसहरू सवारी कुरेका कुर्यै गरेका देखिन्थे ।

वार्तामा मजदुरलाई कुटपिट गर्नेहरुमाथि कारबाही गर्ने, ल्होत्से बहुउद्देश्यीय प्रालिले नयाँबसपार्कमा गरेको भनिएको अनियमितता लगायतका विषयमा छानविन गर्ने, बाँकी मुद्दाहरुबारे मन्त्रालयले गठन गरेको सर्वपक्षीय कार्यदलमा छलफल गर्ने सहमती बनेको बताइएको छ ।