भक्तपुरपोस्ट संवाददाता भक्तपुर, ४ फागुन २०७९
भक्तपुर, ४ फागुन २०७९सत्तारुढ गठबन्धनले नेमकिपाका अध्यक्ष नारायणमान बिजुक्छेंलाई राष्ट्रपतिको उम्मेदवार बनाउने संकेत पाएपछि नेपाली काँग्रेसका तर्फबाट राष्ट्रपतिका सम्भावित उम्मेदवार रामचन्द्र पौडेल भक्तपुरस्थित बिजुक्छें निवास आइपुगेका छन् ।
नेपाली काँग्रेसका वरिष्ठ नेता पौडेलले कमलविनायकस्थित बिजुक्छें निवासमा बिहीबार २ घण्टा बिताएको नेमकिपा श्रोतले जनाएको छ । नेता पौडेलले बिजुक्छेंसंग वर्तमान राजनीतिक अवस्थाको विषयमा राजनीतिक भेटघाट गरेका बताइएको छ ।
वर्तमान नेपालको राजनीतिक घटनाक्रम र आसन्न राष्ट्रपति निर्वाचनको विषयमा दुवै नेता बिच छलफल भएको स्रोतको दावी छ । भेटघाटमा तरुण दलका पूर्व अध्यक्ष एवं भक्तपुरका काँग्रेस नेता विनोद प्रकाश कायस्थ पनि सहभागी रहेका थिए । नेपाली काँग्रेसबाट राष्ट्रपति उम्मेदवारमा बरिष्ठ नेता पौडेल र कृष्ण सिटौलाको नाम चर्चामा रहेको छ ।