बागमती प्रदेश सरकारले चालू खर्च कटौती गर्ने भएको छ । आर्थिक संकट बाट बच्न प्रदेश सरकारले २३ प्रतिशतसम्म चालू खर्च कटौती गर्ने भएको हो ।

प्रदेश सरकारका आर्थिक मामिला तथा योजनामन्त्री जगन्नाथ थपलियाले खर्च कटौती गर्ने सरकारको योजना सार्वजनिक गरेका हुन्।

अनिवार्य गर्नैपर्ने बाहेकका पदाधिकारी र कर्मचारी बैठक भत्ता, भ्रमण भत्ता, अतिरिक्त काम गरेबापत भत्ता जस्ता कार्यमा थप रकम माग नगर्ने र मुख्य सडक र व्यापारिक क्षेत्र आसपास घर आवास भाडामा नलिने मात्र नभई मन्त्रालय र कार्यालयमा खानेपानी पनि बोतलको नखाइ धारा वा जार प्रयोग गर्ने नीति लिइएको छ ।

आर्थिक वर्ष २०७९।०८० को पहिलो ६ महिनामा प्रदेश सरकारको राजस्व संकलन सन्तोषजनक नहुनु, संघीय सरकारबाट प्राप्त हुने अनुदानको राजस्व परिचालन दर अनुमान भन्दा न्यून रहनु र प्रदेश सरकारको पुँजीगत खर्चको प्रगति न्यून हुँदा चालूतर्फको खर्च प्रतिशत उच्च रहँनु लगायतका कारण चालू खर्च कटौती गर्ने योजना बनाइएको मुख्यमन्त्रीका सल्लाहकार डिपी ढकालले बताएका छन् ।