बागमती प्रदेश सरकार मुख्यमन्त्रीका प्रमुख राजनीतिक सल्लाहकार डिपी ढकालले प्रदेश बलियो बनाउने जिम्मा प्रेस जगतको पनि भएको प्रष्ट पारेका छन् । वर्तमान राजनीतिक व्यवस्थाका लागि प्रेस जगतको योगदान स्मरण गर्दै उनले सोकुरा बताएका हुन् ।
शनिवार प्रेस सेन्टर नेपाल, भक्तपुरको साक्षात्कार कार्यक्रमलाई भक्तपुरको न:पुखुस्थित लिल्टाउनमा सम्बोधन गर्दै नेता ढकालले संघीयता माथि प्रहार गर्दै प्रदेश सरकारले केही गरेन भन्नेहरुलाई जवाफ दिनुपर्ने प्रष्ट पारे । बागमती प्रदेश सरकारको काम हेर्न भक्तपुर अस्पताल हेरे पुग्ने जिकिर गर्दै बागमती प्रदेश सरकार मुख्यमन्त्रीका प्रमुख राजनीतिक सल्लाहकार ढकालले संघ मातहत हुँदा हप्ताको ८० जना बिरामी जाच्ने अस्पताललाई अहिले दैनिक ८ सय बिरामी जाच्न सक्ने अवस्थामा पुर्याइएको जानकारी गराए । राजधानी संगै जोडिएको देशकै दोश्रो जेठो भक्तपुर अस्पतालमा आइसीयु आइपुग्न संघीयता नै आउनुपरेको प्रष्ट पार्दै उनले जनताको स्वास्थ्य र शिक्षामा प्रदेश सरकारले महत्वपूर्ण काम गरेको दावी गरे । प्रदेश सरकारको एक विद्यालय एक नर्स कार्यक्रम प्रभावकारी भएपनि प्रचार नभएको भन्दै उनले विद्यालयको भौतिक र शैक्षिक पूर्वाधारको बिकाशमा बागमती प्रदेश सरकारले ठुलो प्रगती गरेको जिकिर गरे ।
कृषी र पर्यटनको बिकासको लागि भएका प्रयासहरुबारे जानकारी गराउदै नेकपा(माओवादी केन्द्र) का केन्द्रीय सदस्य समेत रहेका नेता ढकालले नागरिकलाई स्वरोजगार बनाउने तालिममा मात्र वार्षिक २० करोड लगानी गरेको तथ्यांक प्रस्तुत गरे । स्थानीय तहलाई स्थानीय आवश्यकताको आधारमा अरवौं रुपैया अनुदान उपलब्ध गराउदै आएको उल्लेख गर्दै उनले प्रदेश सरकारले नमूना समाजवादी वडाको लागि २५ करोड उपलब्ध गराएको जानकारी गराए ।
उक्त अवसरमा नेता ढकालले भर्खरै प्रदेशले २० प्रतिसत खर्च कटौती गरेको जानकारी गराउदै प्रदेश सुशासनको लागि समिति नै बनाएर प्रतिबेदन तयार पारेको र त्यसलाई कार्यान्वयन गरिएको दावी गरे ।
कार्यक्रममा नेता ढकालले भक्तपुरको बिकासका योजनाहरु सुनाउदै भक्तपुर जोड्ने चक्रपथ नभएकोले प्रदेश सरकारले भक्तपुरको छुट्टै चक्रपथ बनाउन बजेट व्यवस्था गर्ने देखि खानेपानी र रोजगारको क्षेत्रमा योजना बनाउने बताए । प्रदेश सरकारले उत्पादनमा जोड दिने दावी गर्दै उनले उत्पादन संग जोडिने पेशा व्यवसायलाई संरक्षण र प्रवर्द्धन गरिने जिकिर गरे ।
नेकपा(माओवादी केन्द्र) का केन्द्रीय सदस्य समेत रहेका नेता ढकालले पत्रकारका प्रश्नको सम्बोधन गर्दै संविधानको प्रस्तावनामै शसस्त्र युद्धमा शहिद भएकालाई सम्मान गरिएकोले जनयुद्धमा बिदा दिने सरकारको निर्णय सहि भएको बताए । उनले माओवादी जनयुद्धका एजेन्डा लागू भएकाले जनयुद्धको जीत भएको अवस्थाबारे बताउदै एजेन्डाले जित्ने र योद्धाले हार्ने स्थिति नहुने जिकिर गरे । शान्ति प्रक्रियालाई तार्किक निष्कर्षमा पुर्याएर देश स्थायी शान्ति र दिगो बिकासमा केन्द्रीत हुनुपर्ने उनको भनाइ छ ।
कार्यक्रममा संक्रमणकालिन न्याय, शान्ति, सुशासन, बिकाशनिर्माण, कार्यक्रम र योजनामा रहेर पत्रकारहरुले राखेका बिबिध जिज्ञासाको नेता ढकालले जावफ दिएका थिए । उक्त अवसरमा उनले नेपाल पत्रकार महासंघ भक्तपुरलाई भवन निर्माणमा सहयोग गर्ने आस्वासन दिनुका साथै पत्रकारका रचनात्मक सुझाव प्रदेश सरकारले लागू गर्ने पनि प्रतिवद्धता प्रकट गरे ।
