भक्तपुर, १ चैत २०७९भक्तपुर नगरपालिकाले घर बहाल करमा कडाई गरेको छ । घर बहाल नबुझाउने घरधनीलाई दण्ड जरिबानाको कानुनी व्यवस्था गरी नगरपालिकाले घर बहाल करमा कडाई गरेको हो ।
नगरप्रमुखको सचिवालयले जनाए अनुसार भक्तपुर नगरपालिकाले घर बहाललाइ व्यवस्थित गर्न निर्देशिका नै बनाएको छ । उक्त निर्देशिका १३ औं नगर सभाले पारित गरीसकेको र नेपाल सरकारको राजपत्रमा प्रकाशनका लागि पठाइएको सचिवालय सदस्य कीर्तिका प्रजापतिले प्रष्ट पारिन । राजपत्रमा प्रकाशित भएपछि निर्देशिका कार्यान्वयनमा आउने उनको भनाइ छ ।
नगरपालिकाका कर अधिकृत प्रभाष कुमार चालिसेले निर्देशिका बनेको पुष्टि गर्दै सबै घरधनीलाई करको दायरामा ल्याइने दावी गरे । पहिलोपटक घर बहालको स्व घोषणाको मौका दिइने र कर तिर्न प्रोत्साहित गरिने उनले जानकारी गराए । बहालमा राखेको जानकारी नगराएका घरधनीले घर बहाल लगाएको अनुगमनका क्रममा भेटीए शुरु देखिकै कर असुली गरिने कर अधिकृत चालिसेले जानकारी गराएका छन् ।
उनले घर बहाल करबाट वार्षिक पांच करोड राजश्व असुलीको लक्ष लिइएको समेत बताएका छन् । घर बहालमा दिए वापत प्राप्त हुने रकमको १० प्रतिसत बहाल कर बुझाउनुपर्ने कानुनी व्यवस्था रहेको छ ।
नयाँ नियमअनुसार घरबहालमा लगाउँदा दुवै पक्षबीच अनिवार्य रूपमा सम्झौता हुनुपर्ने र भाडामा दिने र लिने दुवै पक्षले सम्झौतापत्रको एक–एकप्रति राख्नुपर्नेछ । एक प्रति सम्बद्ध वडा कार्यालयमा बुझाउनुपर्ने र घर बहालमा लिने र दिनेको नाम थर, ठेगाना, नागरिकता नम्बर, परिचयपत्र नम्बर र मोबाइल नम्बर उल्लेख हुनुपर्ने छ ।
भक्तपुर नगरपालिकाका प्रमुख सुनिल प्रजापतिले निर्देशिकामा घर भाडामा लिनेदिने बीचको सम्झौता पत्र वडामा पेश गर्न अनिवार्य गरिएको जानकारी गराउदै यसबाट नगरको शान्ति सुरक्षाको अवस्था समेत मजबुद बन्ने तर्क गरे । त्यसैगरी जनसंख्याको सहि यकिन हुने हुँदा खानेपानी वितरण, फोहोर व्यवस्थापन, स्वास्थ्य र शिक्षा लगायत पूर्वाधार बिकासमा पनि यसले सहयोग मिल्ने उनले बिश्वास व्यक्त गरेका छन् । कर तिर्नेले तिरिरहने र नतिर्ने दायरामा नआउने अवस्था निर्देशिकाले अन्त्य गर्ने र सबैलाई कानुन समान रुपले आकर्षित हुने उनको भनाइ छ ।