भक्तपुर, २ चैत्र २०७९बिहीवार आइसिसी क्रिकेट विश्वकप लिग टु अन्तर्गत भएको खेलमा युएईलाई ९ रनले हराउदै नेपाल विश्वकप छनोट चरणमा पुगेको छ । खेल डीएल मेथडमा निर्णय भए संगै नेपालले ९ रनले जीत निकाल्न सफल भएको हो ।
क्रिकेट खेलमा बहुचर्चित डीएल मेथड बारे क्रिकेटप्रेमीहरु जानकार भएपनि सबैलाई थाहा नहुन सक्छ । वर्षा वा खराब मौसमका कारण क्रिकेट खेल रोकिएपछि डीएल मेथड अपनाएर निर्णय गर्ने प्रचलन छ । सो मेथडमा खेल अवरोध भएपछि ओभर घटाएर सोही ओभरमा पहिले ब्याटिंग गरेको टिमको रन रेट तुलना गरी निर्णय गरिन्छ ।
यो मेथड फ्रान्क डकवर्थ र टोनी लुईस मिलेर सन् १९९२ मा आविस्कार गरेका थिए । त्यसकारण नै सो मेथडलाई डकवर्थ लुइस नियम भनिएको हो । जसलाई छोटकरीमा डीएल भनेर जानिन्छ ।
सन् १९९९ को विश्वकपबाट अन्तर्रा्ष्ट्रिय क्रिकेट काउन्सिल (आईसीसी) ले सो मेथड लाई मान्यता दिई लागू गरेको हो । युएईले दिएको ३ सय ११ रनको लक्ष्यसहित नेपाल जवाफी ब्याटिङमा उत्कृष्ट प्रदर्शन गरिरहेको थियो । नेपालले ४४ ओभरमा ६ विकेट गुमाएर २ सय ६९ रन जोडेको थियो तर खराब प्रकाशको कारण खेल रोकिदा डीएलको आधारमा नतिजा तय गरिएको छ । सोही ओभरमा युएईले बनाएको रन भन्दा नेपालले ९ रन बढी बनाएपछि नेपाललाई बिजेता घोषित गरिएको हो ।