भक्तपुर, ८ फागुन २०७९ नेपाल राष्ट्रिय कर्मचारी संगठन (निजामती) को बागमती प्रदेश अध्यक्षमा श्रवण ढुंगाना निर्वाचित भएका छन् । बागमती प्रदेश समितिको दोश्रो अधिवेशनले पूर्वाधार विकाश कार्यालय, काभ्रेका लेखा अधिकृत ढुंगानाको अध्यक्षतामा नयाँ कार्यसमिति निर्वाचित गरेको हो ।
कार्यसमितिको उपाध्यक्षहरुमा राजु अर्याल, कुण्डल बिक्रम बुढाथोकी,जयराम कार्की र सुस्मिता सापकोटा रहेका छन् । त्यसैगरी सचिवमा सिताराम फुयाल, सहसचिवमा छितेन भोटे, कोषाध्यक्षमा सन्तोष ढकाल र सह कोषाध्यक्षमा सरिता ओली निर्वाचित भएका कार्यसमिति सदस्य इश्वर केसीले जानकारी गराएका छन् । कार्यसमिति २१ सदस्यीय रहेको छ । बन्द सत्रमा बागमती प्रदेशका १३ जिल्लाबाट आएका ६७ जना प्रतिनिधि सहभागी रहेका थिए ।
सिंगो कार्यसमिति नै निर्विरोध निर्वाचित भएको बताउदै नवनिर्वाचित अध्यक्ष श्रवण ढुंगानाले अधिवेशनको म्यान्डेट अनुसार पेशागत हकहित र ट्रेड युनियन अधिकारको पक्षको लागिरहने प्रतिवद्धता प्रकट गरेका छन् ।
काठमाडौंमा सम्पन्न अधिवेशनलाई संघीय मामिला तथा सामान्य प्रशासन मन्त्री अमनलाल मोदीले उद्घाटन गरेका थिए । उद्घाटन सत्रमा सम्बोधन गर्दै मन्त्री मोदीले ब्युरोक्रेसीमा कायम रहेको वर्ग विभेद आफूले अन्त्य गर्ने उद्घोष गरेका थिए । पियन र ड्राइभर जस्ता श्रेणी बिहिन कर्मचारीहरुले दिनरात सेवा गरेपनि सेवाको सहि मूल्यांकन हुन नसकेकोप्रति चिन्ता व्यक्त गर्दै उनले उक्त उद्घोष गरेका हुन् ।
मन्त्री मोदीले आफू सामन्तवाद बिरुद्ध लडेर आएको भन्दै कर्मचारीतन्त्रको सामन्तवाद आफूलाई स्वीकार्य नभएको बताए । जगेडा र फाजिलमा राखेर कर्मचारीलाई काम नदिई बरण्डामै दिन बिताउन बाध्य पार्ने प्रबृत्ति बिरुद्ध आफू रहेको उनको भनाइ छ । कर्मचारीतन्त्रमा केही सीमित कर्मचारीको हालीमुहाली रहेको खुलासा गर्दै मन्त्री मोदीले तीनै कर्मचारीले बहुसंख्यक कर्मचारी माथि अन्याय गरिरहेको बताए । आफ्नो कार्यकालमा सरुवा बढुवाको बैज्ञानिक प्रणाली बनाइने र सबैमाथि न्याय गरिने उनको दावी छ ।
उक्त अवसरमा विशेष अतिथि रहेका नेकपा(माओवादी केन्द्र) का बागमती प्रदेश अध्यक्ष एवं प्रदेश सांसद सरल सहयात्री पौडेलले परिवर्तन बिरोधीहरुले माओवादीको बिरोध गरिरहेका बताउदै परिवर्तन पक्षधरहरुले त्यसको प्रतिवाद गर्नुपर्ने प्रष्ट पारे ।
नेपाल राष्ट्रिय कर्मचारी संगठन (निजामती) मा आवद्ध कर्मचारी पार्टीको बैचारिक सेना समेत भएको भन्दै अध्यक्ष पौडेलले पार्टीले ल्याएको बिचार र एजेन्डा लागू गर्दै परिवर्तनको मर्म अनुरुप जनतालाई सेवा गरी सन्तुष्ट पार्नुपर्नेमा जोड समेत दिए । जनताले लडेर ल्याएको व्यवस्था बलियो बनाउन पार्टीको दुत भएर जनताको घरघरमा पुग्न र जनसेवामा जुट्न उनले निर्देशन समेत दिएका थिए ।
कार्यक्रममा नेपाल राष्ट्रिय कर्मचारी संगठन (निजामती) का केन्द्रीय अध्यक्ष हरि रावल लगायत पदाधिकारीको उपस्थिति रहेको थियो ।