मध्यपुर थिमि, ७ बैशाख २०८०मध्यपुर थिमि नगरपालिकामा रहेका अधिकांश संस्थागत(निजी) विद्यालयहरुले ब्यापक शुल्क वृद्धि गरेपछि अभिभावकहरु चिन्तित बनेका छन् । आफूहरुको क्रय शक्ति घटिरहेको वर्तमान अवस्थामा समेत ब्यापक शुल्क वृद्धि गरिएको अभिभावकहरुको गुनासो रहेको छ ।
मध्यपुर थिमिको मातृभूमी नामक एक विद्यालयले मासिक शुल्कमा पाँच हजार र भर्ना शुल्कमा १० हजारका दरले शुल्क वृद्धि गरेपछि अभिभावकहरु आन्दोलित नै भएका थिए । यो त प्रतिनिधि विद्यालय मात्र हो, मध्यपुर थिमिका अधिकांश विद्यालयले कुनै न कुनै बहानामा शुल्क बढाएकै छन् । उनीहरुसंग सम्पर्क गर्दा एउटै शिर्षकमा नभई बिभिन्न शिर्षकमा थोरैथोरै गरी मोटो रकम अभिभावकबाट असुली गर्ने गरेका देखिन्छ । अधिकांश विद्यालयले भक्तपुर पोस्टलाई कक्षागत शुल्क विवरण उपलब्ध गराउन समेत इन्कार गरेका छन् ।
शुल्क वृद्धिबारे स्थानीय सरकारको रुपमा रहेको नगरपालिकामा गुनासाहरु आउन थालेपछि नगरपालिका अनुगमनमा जुटेको छ । मध्यपुर थिमि नगरपालिकाका उपप्रमुख विजय कृष्ण श्रेष्ठले शुल्क वृद्धिबारे यकिन गर्न अनुगमन समिति बनाइएको बताएका छन् । वडा नम्बर ९ का वडाध्यक्ष सानुकाजी राजवाहकको संयोजकत्वमा पाँच सदस्यीय शुल्क अनुगमन समिति बनाइएको बताँउदै उप प्रमुख श्रेष्ठले बढी शुल्क असुल गर्ने विद्यालयलाई कारवाही गरिने र असुलिसकेको शुल्क समेत फिर्ता गराइने दावी गरे । ”कानुन नमान्ने र मनोमानी शुल्क उठाउने विद्यालय संचालकलाई कारवाही गर्न नगरपालिका प्रतिवद्ध छ ।” उप प्रमुख श्रेष्ठले प्रष्ट पारे । विकल्पका रुपमा संचालित संस्थागत विद्यालयहरु नाफामुखी नभई सेवामुखी हुनुपर्ने उनको भनाइ छ ।
शिक्षा क्षेत्रका जानकार समेत रहेका उप प्रमुख श्रेष्ठ निर्वाचित हुनु अघि एक सामुदायिक विद्यालयको व्यवस्थापन समितिका अध्यक्ष थिए । सामुदायिक विद्यालयमा सरकारको ठुलो लगानी भएको भन्दै उनले स्थानीयले चासो राखेका सामुदायिक विद्यालयहरु संस्थागत(निजी) भन्दा राम्रा रहेका बताए । सामुदायिक विद्यालय राम्रो बनाउन र यहाँ निशुल्क पढाउँन छोडेर अभिभावकहरु संस्थागत विद्यालयहरुप्रति आकर्षित हुनु दु:खद पक्ष भएको भन्दै उनले नगरपालिकाले सामुदायिक विद्यालयहरुमा भौतिक विकास एवं शैक्षिक प्रगतीमा प्राथमिकतापूर्वक काम गरिरहेको र स्थानीय जनसहभागिता भएमा सबै सामुदायिक विद्यालय अब्बल बन्ने बताए । यद्यपी आफूहरु संस्थागत विद्यालय प्रति असहिष्णु नरहेको र संस्थागत विद्यालयले शिक्षा क्षेत्रमा गरेको योगदान बिर्सनु नहुने उनको भनाइ छ ।