भक्तपुर, २७ बैशाख २०८०बिक्रम संवत २०६२/६३ को जनआन्दोलनका जिउँदो शहिद काभ्रे बनेपाका मुकेश कायस्थको निधन भएको छ । बुधबार उनको निधन भएको हो ।
जनआन्दोलनका क्रममा २०६२साल चैत २७ गते प्रहरीले चलाएको गोली कायस्थको कञ्चटमा लागेको थियो । गोलीको कारण उनलाई पक्षघात भएको थियो र चेतना आउन सकेन । उनी हिडडुल गर्न पनि सक्दैनथे ।
२०६२ साल चैत २७ गते गोली लाग्दा मुकेश १५ वर्षका थिए । उनी स्थानीय विद्यासागर बोर्डिङ स्कूलमा कक्षा ८ को परीक्षा दिएर बसेका थिए । २०६२ चैत २७ गते सात दलको आह्वानमा देशमा आमहड्ताल चल्दै थियो। पोखरामा सैनिकको गोलीबाट काभ्रेको उग्रचण्डी नालाका भीमसेन दाहालको मृत्यु भैसकेको थियो। भीमसेनको शव पोखराबाट सेनाको हेलिकप्टरमा काभ्रे ल्याइँदै थियो। शव लिन नालाबाट धुलिखेल आउँदै गर्दा बनेपामा भएको प्रदर्शनमा प्रहरीले हस्तक्षेप गरी गोली चलाएको थियो ।
गोली लागि शिवहरि कुँवर घटनास्थलमै मारिए भने मुकेश गम्भीर घाइते भए । घटनाको बिरोधमा सोही दिन राति अर्थात २०६२ चैत २७ गते इलाका प्रहरी कार्यालय बनेपामा स्थानीयबासीहरूले आगो लगाएर ध्वस्त बनाइदिएका थिए ।