भक्तपुर, २८ बैशाख २०८०भक्तपुरको मध्यपुर थिमि नगरपालिकाबाट सरुवा भई सिन्धुपाल्चोकको बाह्रबिसे पुगेका भक्तपुर निवासी प्रमुख प्रशासकीय अधिकृत चुरामणी पन्थी पुन गृह जिल्ला फर्किएका छन् । मध्यपुर थिमि बाट बाह्रबिसे पुगेको करिब ७ महिनामै भक्तपुरको चाँगुनारायण नगरपालिकामा सरुवा भएपछि उनले कार्यभार सम्हालेका हुन् ।
नगर प्रमुख जीवन खत्रीको नेतृत्वमा रहेको नगरपालिकामा एक विशेष कार्यक्रमका बीच बुधवार उनलाई स्वागत गरिएको हो भने सरुवा भएका हिरामणी सुवेदीको बिदाइ समेत सम्पन्न भएको छ । सुवेदी करिब ८ महिने बसाइपछि सिंहदरवार स्थित राष्ट्रिय सतर्कता केन्द्रमा सरुवा भइ गएका छन् ।
उक्त स्वागत तथा बिदाइ कार्यक्रमलाई सम्बोधन गर्दै नगर प्रमुख खत्रीले राष्ट्र सेवक कर्मचारीले सेवालाई सेवाग्राही मैत्री बनाए मात्र स्थानीय सरकार सफल हुने र जनताले घर आगनमै आफ्नो सरकार भएको अनुभूति गर्न सक्ने बताए ।
प्रमुख प्रशासकीय अधिकृत पन्थीले स्थानीयले अनुभव गर्ने गरी सुशासन कायम गरिने र चाँगु नारायणको बिकासमा थप योगदान दिने प्रतिवद्धता प्रकट गरेका छन् । प्रमुख प्रशासकीय अधिकृत पन्थी भक्तपुरको सूर्यविनायक-५ का बासिन्दा हुन् । निर्वाचन कार्यालय भक्तपुरमा समेत लामो समय कार्यालय प्रमुख रहेका पन्थीको जिल्लाका सबै राजनीतिक दलसंग राम्रो सम्बन्ध रहेको छ भने आफ्नो सरल स्वभाव र मिलनसार ब्यवहारका कारण उनी स्थानीय माझ पनि लोकप्रिय रहेका छन् ।