भक्तपुर, २८ बैशाख २०८० पाकिस्तानको सर्वोच्च अदालतले पूर्व प्रधानमन्त्री इमरान खानलाई तत्काल रिहा गर्न आदेश दिएको छ । उनको गिरफ्तारीलाई ‘गैरकानुनी’ ठहर गर्दै बिहीबार उक्त आदेश आएको हो ।
गत वर्ष अप्रिलमा प्रधानमन्त्री पदबाट हटाइएका खानलाई अपमान पूर्वक अदालत परिसर बाटै हिरासतमा लिइएको थियो । पाकिस्तानका प्रधान न्यायाधीश उमर अता बन्दियालले खानलाई इस्लामाबाद उच्च अदालत परिसरबाट हिरासतमा राख्नु देशको कानुनी प्रणालीको ठूलो अपमान भएको भन्दै अदालतमा उपस्थित गराउन आदेश दिएका थिए ।
खानको गिरफ्तारीपछि पाकिस्तानमा अशान्तिको स्थिति देखिएको थियो । पीटीआईले आफ्ना समर्थकलाई इमरान खानको समर्थनमा आउन आग्रह गरेसँगै देशभर विभिन्न विरोध प्रदर्शन भएका छन् ।
प्रदर्शनका क्रममा कम्तीमा १० जनाको मृत्यु भएको छ भने करिब दुई हजारभन्दा बढी व्यक्ति घाइते भएका छन् । देशभरबाट सयौँ प्रदर्शनकारी पक्राउसमेत परेका छन् ।