भक्तपुर, २९ बैशाख २०८०भक्तपुर २९ बैशाख २०८० । भुमिसुधार तथा मालपोत कार्यालय भक्तपुरले सरसफाइ कार्यक्रमको सुरुवात गरेको छ । महिनाको अन्तिम शुक्रवार नियमित सरसफाइ गर्ने उद्देश्यले अभियान सुरुवात गरिएको हो ।
शुक्रवार भुमिसुधार तथा मालपोत कार्यालय भक्तपुरका कार्यालय प्रमुख लोक बहादुर भणडारीले सफाइ अभियान शुरु गरिएको घोषणा गरेका हुन् । कार्यालय परिसर फोहोर हुँदा कार्यालय प्रति सकारात्मक सोच पैदा नहुने भएकोले सफाइलाई अभियानकै रुपमा अघि बढाइएको भण्डारीको भनाइ छ ।
सेवाग्राहीको बढी चाप हुने कार्यालय भएको हुँदा सरसफाइमा बढी ध्यान दिनुपर्ने बताउदै पार्किङ समस्याको समाधान गर्नका निमित्त भक्तपुर नगरपालिकासङ्ग समन्वय भैरहेको समेत उनले बताए ।
बाहिरी बाताबरण मात्र स्वच्छ बनाउने नभई कार्यालय भित्र पनि सेवा प्रवाहका क्रम्मा हुने अनियमितता नियन्त्रण गरिएको उनको दावी छ । “मालपोत भन्ने बित्तिकै नाक खुम्च्याउने मानिसलाई वाह ! भन्ने वातावरण बनाउदैछौ ।” कार्यालय प्रमुख भण्डारीले भने ।
सरसफाइ कार्यक्रममा भक्तपुर मालपोतका साथै नापी कार्यालयका प्रमुख नापी अधिकृत रबिन्द्र सापकोटा लगायत ३० कर्मचारीको उपस्थिति रहेको मालपोत कार्यालय भक्तपुरका कर्मचारी बिजयराम बनमालाले जानकारी दिएका छन् ।
