भक्तपुर, ३० बैशाख २०८०नेकपा (एमाले) ले पार्टीका कमिटीहरू भद्दा भएका भन्दै प्रदेशदेखि वडा कमिटीसम्म अधिवेशन गर्ने निर्णय गरेको छ । पार्टी कार्यालय च्यासलमा बसेको केन्द्रीय समितिको बैठकले यस्तो निर्णय गरेको हो ।
अधिवेशन गर्दा माथिबाट अर्थात पहिले प्रदेश कमिटी, त्यसपछि जिल्ला, पालिका हुँदै वडा र टोल कमिटीका अधिवेशन सम्पन्न गरिने निर्णय भएको पार्टीका पोलिटब्युरो सदस्य महेश बस्नेतले बताएका छन् । पदमा बस्न मरिहत्ते गर्ने तर जिम्मेवारी बहन नगर्ने प्रवृत्ति बढेको निष्कर्ष निकाल्दै बैठकले लगातार तीन बैठकमा अनुपस्थित हुनेलाई कमिटीबाट बिदा दिने विषयमा पनि निर्णय लिएको बताइएको छ ।
पार्टी सदस्यता नवीकरणको काम असार मसान्तभित्र सम्पन्न गरिसक्ने र वादाका कुल मतदाताको ३ प्रतिसत कार्यकर्ता बिस्तार गर्ने निर्णय भएको नेता बस्नेतले बताए ।
पार्टीको जनआधार विस्तार गर्न जनसंगठनलाई पार्टी कार्यकर्ता निर्माण गर्ने ‘इन्कुभेसन सेन्टर’को रुपमा रुपान्तरित गरिने र राजनीतिक ध्रूवीकरणलाई प्रभावकारी बनाउनका लागि पार्टी प्रवेशलाई अभियानका रुपमा अघि बढाइने केन्द्रीय कमिटीले निर्णय गरेको बताइएको छ ।
मिसन ग्रासरुट बाट उत्साहित हुँदै पार्टीले ‘मिसन योङ्ग’ अभियान सञ्चालन गर्ने समेत केन्द्रीय कमिटीले कार्ययोजना बनाएको छ । पार्टीमा युवा आकर्षण र युवा सहभागिता विस्तार गर्न जरूरी देखिएको हुँदा नयाँ अभियान सञ्चालन गरिने छ । साथै, “देशैभरि–छोराछोरी”को नारामा पार्टीका नेता कार्यकर्ताको घरघरबाटै युवा–कार्यक्रम सञ्चालन गरिने छ ।
त्यस्तै प्रचारात्मक काम र सामाजिक सञ्जालको प्रभावकारी प्रयोग गर्ने कार्य योजना बनाइएको समेत नेता बस्नेतले बताएका छन् ।