सरकारको भ्रष्टाचार बिरोधी कदमप्रति नागरिक आन्दोलनका अगुवाहरूले सन्तोष व्यक्त गरेका छन् । भुटानी शरणार्थी प्रकरणको अनुसन्धानमा सरकारले देखाएको साहसप्रति उनीहरुले सन्तोष व्यक्त गरेका हुन् ।

नागरिक आन्दोलनका अगुवाहरु डा. देवेन्द्रराज पाण्डे र कृष्ण पहाडीले मंगलवार उपप्रधान तथा गृहमन्त्री नारायणकाजी श्रेष्ठलाई भेटेर भ्रष्टाचारविरुद्धको पहलप्रति समर्थन, ऐक्यबद्धता, अपेक्षा र विश्वास व्यक्त गरेका हुन् । उनीहरुले सरकारको भ्रष्टाचार बिरोधी कदमले नागरिक उत्साहित रहेका बताउँदै अनुसन्धान र कारवाहीलाई निष्कर्षमा पुर्‍याई छाड्न खबरदारी समेत गरेका छन् ।

उक्त अवसरमा उपप्रधान तथा गृहमन्त्री नारायणकाजी श्रेष्ठले प्रहरीले स्वतन्त्रतापूर्वक अनुसन्धान अघि बढाइरहेको जानकारी गराउदै निर्दोष नपर्ने र दोषी उम्कन नसक्ने दावी गरे । नागरिक समर्थनले अनुसन्धानमा थप उत्साह थपेको भन्दै उनले नागरिक समाजलाई धन्यवाद ज्ञापन समेत गरेका उनका प्रेस सल्लाहकार कमल गिरीले जानकारी गराए ।