भक्तपुर, ४ जेठ २०८०भक्तपुर नगरपालिकाद्वारा सञ्चालित ख्वप अस्पतालले प्रसुती सेवा शुरु गरेको करिब २ सातामा पहिलो शल्यक्रिया सफलतापूर्वक सम्पन्न गरेको छ । अस्पतालले बिहीवार प्रसुती गराउने क्रममा शल्यक्रिया सेवा प्रदान गरेको हो ।
भक्तपुर ७ गोल्मढीकी एक महिलालाई शल्यक्रियामार्फत प्रसुती सेवा प्रदान गरिएको ख्वप अस्पतालका निमित्त मेडिकल डाइरेक्टर मजेशप्रताप मल्लले जानकारी दिएका हुन् ।
उनका अनुसार डा. युजिन श्रेष्ठ र डा. कृष्णप्यारी दुगुजुको टोलीले शल्यक्रिया गरेको थियो भने शल्यक्रियामा एनेस्थेसियोलोजिस्ट डा. सन्देश ख्वान्जु, बाल रोग विशेषज्ञ डा. विजय चिकंबन्जार, स्टाफ नर्सहरू रबिना कवां, गीता सुवाल, सोनी जोशी र रिचा कोजुलगायतको सहभागिता रहेको थियो । बच्चा र आमादुबैको स्वास्थ्य अवस्था राम्रो रहेको बताइएको छ ।
ख्वप अस्पतालमा प्रसुती सेवा सञ्चालन भएसँगै गर्भावस्थाको चिकित्सकीय सेवा लिन सजिलो भएको छ । प्रसुतीको लागि अन्य अस्पतालमा जानुपर्ने बाध्यताको अन्त्य भएको अस्पतालले उद्घोष गरेको छ । ख्वप अस्पताल सञ्चालनको २ वर्ष पुगेको अवसरमा अस्पतालले २०८० वैशाख १७ गतेबाट प्रसुति सेवा विस्तार गरेको थियो ।