भक्तपुर, ६ जेठ २०८०मध्यपुर थिमि नगरपालिकाको वडा नं. ४ स्थित निगु: पुखु(दुईपोखरी)मा आज शनिवार व: फेस्टिवल आयोजना गरिएको छ । मध्यपुर थिमी नगरपालिकाको आयोजना तथा मध्यपुर थिमी पर्यटन बिकास समितिको संयोजनमा व: फेस्टिवल आयोजना गरिएको हो ।
व: भनेको नेवाः समुदायको विशेष परिकार हो । मास, मुगी तथा अन्य विभिन्न गेडागुडी सफा गरी भिजाइ त्यसपछि पिसेर तावामा विभिन्न आकार प्रकारमा पकाइने स्वादिलो परिकारलाई व: भनिन्छ । यसमा स्वाद अनुसार अण्डा, मासु समेत राखी बनाइन्छ ।
लिच्छवी र मल्ल कालदेखी नै नेवा समुदायको सुख दुःखमा वः नभई नहुने परिकारको रुपमा रहेको छ । फेस्टिबलमा वः को महत्व, यसका प्रकार र यसको उपयोगको ईतिहासका बारेमा जानकारी दिने र पर्यटनसंग जोड्ने उदेश्य रहेको गरिरहेको पर्यटन बिकास समितिका सचिव शिव सुन्दर श्रेष्ठले बताए ।
फेस्टिवलमा खानाको मात्र पन्ध्र वटा स्टल रहेको छ भने स्थानीय उत्पादनको प्रदर्शनीसमेत रहेको सचिव श्रेष्ठले जनाएका छन् ।फेस्टिवलमा नगरको मात्र नभई उपत्यकाका अन्य शहर बाट पनि हजारौं मानिस अवलोकनका लागि आउने आयोजकले अपेक्षा गरेको छ ।
फेस्टिबलले मध्यपुर थिमीलाई चिनाउन र यहाको पर्यटन प्रबर्द्धनमा योगदान गर्ने मध्यपुर थिमीका उप प्रमुख विजय कृष्ण श्रेष्ठले बिश्वास व्यक्त गरेका छन् । बिभिन्न प्रकारका व: पस्कन स्थानीय महिला समूह उत्साहित छ । खानाको पारखीका लागि आज मध्यपुर थिमी एक गन्तब्य बन्ने निश्चित देखिन्छ ।