भक्तपुर, ६ असार २०८०, भक्तपुर नगरपालिकाले निजी पार्किङ्ग नहुनेलाई सवारी साधन खरिदमा निरुत्साहन गर्ने भएको छ । आगामी आर्थिक वर्षदेखि नै लागू हुनेगरी निजी सवारी खरिद गर्न निजी पार्किङ्ग हुनुपर्ने नीति ल्याइएको हो ।
बुधवार नीति तथा कार्यक्रम सार्वजनिक गर्दै नगर प्रमुख सुनिल प्रजापतिले नयाँ सवारीसाधन खरिद गर्न चाहने नगरबासीले निजी पार्किङ्ग व्यवस्था गर्नुपर्ने बताए । सम्बन्धित पक्षसंग समन्वय गरी सो नीति लागू गरिने उनको भनाइ छ ।
८८ बुँदे नीति तथा कार्यक्रमको अन्तिम बुँदामा यो व्यवस्था गरिएको हो । नेमकिपाका अध्यक्ष नारायणमान बिजुक्छेंले उद्घाटन गरेको १४ औं नगर सभामा नीति तथा कार्यक्रम सार्वजनिक गर्दै नगर प्रमुख सुनिल प्रजापतिले बिजुक्छेंले कल्पना गरेको भक्तपुरको सपना साकार पारिने बताए । भक्तपुरलाई ज्ञानविज्ञानको केन्द्र, सांस्कृतिक नगर र जीवित सङ्ग्रहालयको रुपमा विकास गर्ने जिकिर गर्दै नगर प्रमुख प्रजापतिले सबै नगरबासीको आफूहरुलाई साथ् र सहयोग प्राप्त हुने बिश्वास व्यक्त गरेका छन् ।
त्यसैगरी नगरपालिकाले उपयुक्त पोखरीलाई पौडी पोखरी बनाउने पनि नीति लिएको छ । नगरपालिकाले ताइचिन च्युरा, जुजु धौ, भादगाउँले टोपी लगायत स्थानीय बस्तुलाई ब्राण्डिङ्ग र बिस्तारको नीति लिएको छ ।
नगरपालिकाले युवालाई आत्मनिर्भर बनाउन बिभिन्न प्राविधिक एवं ब्यवसायिक तालिम तथा रोजगारीका लागि लोकसेवा र शिक्षक सेवा आयोगका कक्षाहरु संचालन गर्ने समेत बताइएको छ ।