चाँगुनारायण नगरपालिकाले सबै वडासंग जोडिने सडक संजालमा जोड दिएको छ । शुक्रवार सार्वजनिक गरिएको नीति तथा कार्यक्रममा ९ वटै वडा कार्यालय देखि नगर कार्यापालिका कार्यालय सम्म जोड्ने सडक संजाल बनाइने उद्घोष गरिएको हो ।

यातायातमा सुगमता नदेखिएको चाँगुनारायण नगरपालिकाका नगर प्रमुख जीवन खत्रीले नीति तथा कार्यक्रम प्रस्तुत गर्दै सडक संजाललाई उच्च प्राथमिकतामा राखी निर्माण कार्य अघि बढाउने बताए । उनले सबै वडाका मूख्य सडक लाई कालोपत्रे/पक्की बनाइने नीति तथा कार्यक्रम समेत सार्वजनिक गरेका छन् ।

कृषी उत्पादन र पर्यटन प्रवर्द्धनको आधारमा सडक निर्माण गर्ने नगरपालिकाको नीति रहेको छ ।

सडक निर्माणमा मात्र नभई यातायातका सवारी संचालनमा समेत नीति तथा कार्यक्रममा स्पष्ट पारिएको छ । सार्वजनिक यातायात प्रणालीलाई सुद्रिढ र व्यवस्थित बनाउन उपत्यकाका अन्य स्थानीय तहसंग समन्वय, सहकार्य र साझेदारी गरी एकीकृत सार्वजनिक यातायात योजना कार्यान्वयनका लागि पहल गर्ने समेत नीति तथा कार्यक्रममा उल्लेख गरिएको छ ।

सडक निर्माण र यातायातका साधन आवागमनमा अवरोध गर्नेलाई निरुत्साहनको नीति लिदै नगरपालिकाले द्रुत मार्गका साथै खासाङ्ग खुसुङ्ग खोला र घट्टेखोलामा नयाँ करिडोर निर्माण अघि बढाउने नीति लिएको छ ।

त्यसैगरी स्थानीय व्यवसायीको साझेदारीमा विद्युतीय सवारी साधन संचालनका लागि पहल गरिने समेत नगर प्रमुख खत्रीले नीति तथा कार्यक्रम मार्फत सार्वजनिक गरेका छन् । विद्युतीय सवारी संचालन गर्न सके प्रदुषण पनि नहुने र बस्तीबस्तीमा यातायात सुविधा पुर्याउन सकिने नगरपालिकाले बिश्वास लिएको छ ।

तस्वीर : आशिष पौडेल