भक्तपुर, २० असार २०८०भक्तपुरको मध्यपुर थिमि नगरपालिका–३ तेर्साटारमा दिनदहाडै लाखौँको धनमाल चोरिएको छ । मंगलवार दिउँसो करिव साढे १२ लाख रुपैंया बराबरको धनमाल चोरी भएको हो ।
स्थानीय राजन ढुंगेलको घरको भुईंतल्लामा डेरा गरी बस्ने दोलखा कालिञ्चोक गाउँपालिका–८ की ३१ वर्षिया श्रीजना बस्नेतको कोठाबाट सो धनमाल चोरी भएको छ । बिहान करिव १० बजे काममा गएकी बस्नेतले राती ८ बजे कोठामा फर्कदा मात्र चोरी बारे थाहा पाएकी थिइन् ।
बिहान १० बजेदेखी राती ८ बजेको बीचमा बस्नेतको कोठाको मुलढोकाको ताला फोडी भित्र प्रवेश गरेको समूहले दराज र दराजभित्रको सेफ समेत फोडी चोरी गरेका देखिएको प्रहरी प्रभाग सानोथिमिका प्रमुख प्रहरी वरिष्ठ नायव निरिक्षक रमेश राईले जनाएका छन् । सुन र हिराका गरगहना लगायत कुल १२ लाख ४० हजार रुपैंया बराबरको धनमाल चोरी भएको प्रहरीको भनाइ छ । प्रहरी प्रभाग सानोथिमिका प्रमुख प्रहरी वरिष्ठ नायव निरिक्षक रमेश राईका अनुसार घटनाको थप अनुसन्धान र चोरहरुको खोजी कार्य भैरहेको छ ।